ލިވަޕޫލްގެ ގޯލްކީޕަރު އެލިސަން ބެކާގެ އުނަގަނޑަށް ލިބުނު އަނިޔާއާ ގުޅިގެން، ކުރިއަށް އޮތް ދެ މެޗުގައި އޭނާ ނުކުޅެވޭނެ ކަމަށް އެ ޓީމުގެ ކޯޗު ޔާގެން ކްލޮޕް ބުނެފި އެވެ.

އެލިސަންއަށް އަނިޔާވެފައިވަނީ އެފްއޭ ކަޕްގައި މި މަހުގެ ހަތަރުވަނަ ދުވަހު ޗެލްސީއާ ދެކޮޅަށް ލިވަޕޫލުން ނުކުތް މެޗުގެ ކުރިން، އެޓީމުން ކުރިއަށްގެންދިޔަ ފަރިތަކުރުންތަކުގެ ތެރެއިންނެވެ. މި އަނިޔާއާ ގުޅިގެން އެފްއޭ ކަޕްގައި ޗެލްސީ އަތުން 2-0 އިން ލިވަޕޫލް ބަލިވި މެޗުގައި ލިވަޕޫލްގެ ގޯލް ބަލަހައްޓާފައިވަނީ އެޑްރިއަން އެވެ.

ލިވަޕޫލްގެ ކޯޗު ޔާގެން ކްލޮޕް ބުނީ އެލިސަންގެ އަނިޔާ ސީރިއަސް ނޫން ނަމަވެސް، މި ހަފުތާގައި ލިވަޕޫލުން ކުޅެން އޮތް ދެ މެޗުގައި އޭނާއަށް ނުކުޅެވޭނެ ކަމަށެވެ. އެހެންކަމުން އިނގިރޭސި ޕްރިމިއާ ލީގުގައި ހޮނިހިރު ދުވަހު ހަވީރު ބޯންމަތާ ދެކޮޅަށް ކުޅޭ މެޗާއި ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ އެތުލެޓިކޯ މެޑްރިޑާ ދެކޮޅަށް ކުޅޭ ދެވަނަ ލެގުގެ މެޗުގައި އޭނާއަށް ނުކުޅެވޭނެ އެވެ.

ލިވަޕޫލްގެ ގޯލްކީޕަރު އެލިސަންއަށް އަނިޔާވިއިރު، އެޓީމުން އެންމެ ފަހުން ކުޅުނު ހަތަރު މެޗުގެ ތެރެއިން ތިން މެޗުން ވަނީ ބަލިވެފައެވެ. ޗެމްޕިއަންސް ލީގުގައި އެތުލެޓިކޯއާ ދެކޮޅަށް ކުޅުނު ފުރަތަމަ ލެގުގައި 1-0 ގެ ނަތީޖާއަކުން ލިވަޕޫލް ބަލިވިއިރު، އެފްއޭ ކަޕުން ލިވަޕޫލް ވަނީ ކަޓާފައެވެ. އަދި މެޗަކުން ބަލިނުވެ އިނގިރޭސި ޕްރިމިއާ ލީގު ޗެމްޕިއަންކަން ހޯދަން މަސައްކަތް ކުރަމުން އައި ލިވަޕޫލްގެ ސިލްސިއާއަށް މިދިޔަ ހަފުތާގައި ވަޓްފޯޑުން ވަނީ ނިމުން ގެނެސްފައެވެ.