އާސަންދައާ ގުޅިގެން ޓައިނީ ހާރޓްސް އޮފް މޯލްޑިވްސް އިން މި މަހު ބޭއްވުމަށް ހަމަޖެހިފައވާ "ކެއަރ ފޮރ ޓައިނީ ހާރޓްސް" ކޭމްޕް ކެންސަލްކޮށްފިއެވެ.
ޓައިނީ ހާރޓްސްއިން ބުނީ މި ހިނގާ މާޗް މަހުގެ 7 އިން 9 އަށް އޭޑީކޭ ހޮސްޕިޓަލްގައި ބޭއްވުމަށް ހަމަޖެހިފައިވާ މި ހަރަކާތް ކެންސަލް ކުރަން ޖެހުނީ ދުނިޔޭގައި ހަލުވިކަމާއެކު ފެތުރެމުންދާ ކޯވިޑް-19 ގެ ސަބަބުން ރާއްކޭތެރި ފިޔަވަޅެއްގެ ގޮތުގައެވެ. އަދި މި ބަލީގެ ސަބަބުން ދަތުރުކުރުމަށް ގިނަ ދަތިތަކައް ކުރިމަތިވާކަން އެ ޖަމިއްޔާއިން ފާހަގަކޮށްފައިވެއެވެ.
މި ކޭމްޕްގައި އިންޑިއާއިން ޒިޔާރަތް ކުރާ ކުޑަކުދިންގެ ހިތުގެ ބައްޔަށް ހާއްސަ ދެ ޑޮކްޓަރުންނަށް 165 ފަރާތެއް ދެއްކުމަށް ވަނީ ހަމަޖެހިފައެވެ. އެހެންކަމުން، ޓައިނީ ހާރޓްސްއިން ބުނީ، މި ކޭމްޕް ފަހުގެ ތާރީހަކަށް ފަސްކުރަން ނިންމާފައިވާކަމަށެވެ.
މި ޑޮކްޓަރުންނަށް ދެއްކުމަށް ރާއްޖެގެ އެކިކަންކޮޅުން ގިނަ ފަރާތްތަކެއް މާލެއަށް އައުމަށް ހަމަޖެހިފައިވާއިރު، މި ނިންމުމުގެ ސަބަބުން ދިމާވެދާނެ އުނދަގޫތަކަށް އެ ޖަމިއްޔާއިން މާފަށް އެދުނެވެ. އަދި ކޭމްޕް ބޭއްވޭނެ ތާރީހެއް އިއުލާން ކުރާނެކަމަށް ބުންޏެވެ.
