ޖަޕާނުގެ ވެރިރަށް ޓޯކިޔޯގައި ބޭއްވުމަށް ހަމަޖެހިފައިވާ އޮލިމްޕިކް ގޭމްސް 2020 ފަސްކުރަން ޖެހިދާނެ ކަމުގެ އިޝާރާތެއް ޖަޕާނުގެ އޮލިމްޕިކް މިނިސްޓަރު ދީފި އެވެ.
މިއަހަރުގެ އޮލިމްޕިކްސް ޓޯކިޔޯގައި ބޭއްވުމަށް ތާވަލުކޮށްފައިވަނީ ވަނީ ޖުލައި 24 އިން އޮގަސްޓް 9 އަށެވެ.
ޖަޕާނުގެ އޮލިމްޕިކް މިނިސްޓަރު ސެއިކޯ ހަޝިމޯޓޯ ދާދި ފަހުން ވިދާޅުވީ އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ޖަޕާނާއެކު އެއްބަސްވެފައިވަނީ މިއަހަރުގެ ތެރޭގައި އޮލިމްޕިކްސް ބޭއްވުމަށް ކަމަށާއި، އެހެންކަމުން މިހާރު ހަލުވިކަމާއެކު ފެތުރެމުންދާ ކޮރޯނޯ ވައިރަސް (ކޮވިޑް-19) ގެ ސަބަބުން މިއަހަރުގެ ފަހު ކޮޅަށް ގޭމްސް ފަސްކުރަން ޖެހިދާނެ ކަމަށެވެ. އެކަމަކު މިހާރުވެސް ތާވަލުކޮށްފައި އޮތް ތާރީޚުގައި ގޭމްސް ބޭއްވުމަށް މަސައްކަތް ކުރަމުން އަންނަ ކަމަށްވެސް ވިދާޅުވި އެވެ.
ކޮރޯނާ ވައިރަހުގެ ސަބަބުން އޮލިމްޕިކްސްއަށް އަސަރުކުރާނެ ކަމަށް ބެލެވޭއިރު، އޮލިމްޕިކަށް ޖަޕާނުން އަންނަނީ ވަރަށް ބޮޑެތި ތައްޔާރީތައް ވަމުންނެވެ. އެގޮތުން މިފަހަރުގެ ގޭމްސް ތިވާވެއްޓާ ރައްޓެހި ގޭމްސްއަކަށް ހެދުމަށް އަންނަނީ މަސައްކަތް ކުރަމުންނެވެ. އެގޮތުން މި ފަހަރުގެ މެޑެލްތައް އިލެކްޓްރޯނިކް ކުނިބުނި ރިސައިކަލްކޮށްގެން ތައްޔާރުކޮށްފައިވާއިރު، އޮލިިމްޕިކް ޓޯޗު ތައްޔާރުކޮށްފައި ވަނީ އެލުމިނަމްގެ ކުނިބުނިންނެވެ. އަދި މުބާރާތުގެ އެކިއެކި އިވެންޓްތަކުގައި ބަހައްޓާ ޕޯޑިއަމްތައް ކަނޑަށް އުކާލައިފައި ހުންނަ އެކި ބާވްތަތްކުގެ ޕްލާސްޓިކް ކުނިން ތައްޔާރުކޮށްފައިވާ އިރު، މުބާރާތުގެ ތެރޭގައި ބޭނުންކުރާ ކަރަންޓަކީ އިޔާދަކުރަނިވި ހަކަތަ އެވެ. އަދި އޮލިމްޕިކްސް އާއި ޕެރައޮލިމްޕިކްސްގެ އެތުލީޓުންނާއި އޮފިޝަލުންނަށް ހާއްސަކޮށްގެން ކާޑްބޯޑުން ތައްޔާރުކޮށްފައިވާ އެނދުތައް ބޭނުންކުރަން ވަނީ ނިންމާފައެވެ.
އޮލިމްޕިކްސް ފަސްކުރާނެ ކަމުގެ އިޝާރާތެއް ޖަޕާނުގެ އޮލިމްޕިކް މިނިސްޓަރު ދިންއިރު، ޗައިނާގައި މިމަހު ބާއްވަން ހަމަޖައްސާފައި އޮތް އޭޝިއަން އިންޑޯ އެތުލެޓިކްސް ޗެމްޕިއަންޝިޕް ވަނީ ކެންސަލްކޮށްފައެވެ. އަދި ހަމަ މިމަހު ބާއްވަން ހަމަޖައްސާފައި އޮތް ވޯލްޑް އިންޑޯ އެތުލެޓިކްސް ޗެމްޕިއަންޝިޕް މިހާރު ވަނީ ފަސްކޮށްފައެވެ.
ޔޫރަޕްގެ ގިނަ ގައުމުތަކުން ކޮރޯނާ ވައިރަސް ފެނިފައިވާއިރު، ގިނަ ގައުމުތަކުން އަންނަނީ ސަލާމަތީ ފިޔަވަޅުތައް ވަރުގަދަ ކުރަމުންނެވެ. މިހާތަނަށް ކޮރޯނާ ވައިރަސް 60 އަށްވުރެ ގިނަ ގައުމަކުން ފެނިފައިވާއިރު، މި ވައިރަސް ޖެހިގެން 3،000 އަށްވުރެ ގިނަ މީހުން ވަނީ މަރުވެފައެވެ.
