ރިސޯޓު ލީގު 2020 ގެ ދ. ޒޯނުގެ ސެމީ ފައިނަލަށް ކަނޑިންމަ މޯލްޑިވްސް އާއި ސެއިންޓް ރީޖަސް ދަތުރުކޮށްފި އެވެ.

ދ. ޒޯނުގެ ކުޅުން ކަނޑިންމައިގައި ކުރިއަށްދާއިރު، އަންގާރަ ދުވަހު ގްރޫޕް ބީގައި ކުޅުނު މެޗުން ކަނޑިންމަ މޯލްޑިވްސް ވަނީ އަންގްސާނާ ވެލާވަރު އަތުން 7-5 އިން މޮޅުވެފައެވެ.

މި މެޗުގައި ކަނޑިންމަގެ ލަނޑުތައް ޖަހައިދިނީ ހެޓްރިކް ހެދި އާފާގު ހަމީދާއި ދެ ލަނޑު ކާމިޔާބުކުރި އަލީ ޝާމިއުގެ އިތުރުން މުހައްމަދު ޝާހު އާއި އަބްދުލް މުޤުސިތު އެވެ. ވެލާވަރުގެ ލަނޑުތައް ޖަހައިދިނީ އިބްރާހީމް ފަޒީލާއި ހަސަން ސާމަންގެ އިތުރުން އިބްރާހީމް އާދަމެވެ. މީގެ ތެރެއިން އިބްރާހީމް ފަޒީލާއި ހަސަން ސާމަން، މި ކޮންމެ ކުޅުންތެރިއަކު ވަނީ ދެ ލަނޑު ޖަހާފައެވެ.

މި ނަތީޖާއާއެކު ގްރޫޕް ބީގެ އެއްވަނަ ކަނޑިންމަ އަށް ލިބުނީ ކުޅުނު ދެ މެޗުން ވެސް މޮޅުވެ 6 ޕޮއިންޓާއެކު އެވެ. ދެވަނައިގައި އޮތް ވެލާވަރާއި ތިންވަނައިގައި އޮތް ނިޔާމައަށްވެސް އެއް ޕޮއިންޓު ލިބިފައިވާއިރު، ވެލާވަރަށް ދެވަނަ ލިބުނީ ޖެހި ލަނޑު ގިނަވުމުންނެވެ.

މީގެ އިތުރުން އަންގާރަ ދުވަހު ގްރޫޕް އޭގައި ކުޅުނު މެޗުން ސެއިންޓް ރީޖަސް އާއި ސަން އަކުއާ ވިލު ރީފް ވަނީ 2-2 އިން އެއްވަރުވެފައެވެ.

މި މެޗުގައި ސެއިންޓް ރީޖަސްގެ ދެ ލަނޑުވެސް ޖަހައިދިނީ އަހުމަދު ޝާފިއު އެވެ. އަދި ވިލު ރީފްގެ ލަނޑުތައް ކާމިޔާބުކޮށްދިނީ އައިހަމް އިބްރާހީމް ޝިހާމާއި އާޒިމް އަބްދުﷲ އެވެ.

މި ނަތީޖާއާއެކު ގްރޫޕް އޭގެ އެއްވަނަ ސެއިންޓް ރީޖަސްއަށް ލިބުނީ 4 ޕޮއިންޓާއެކު އެވެ. ދެވަނައިގައި އޮތް ވިލު ރީފަށްވެސް ހަތަރު ޕޮއިންޓު ލިބިފައިވާއިރު، ސެއިންޓް ރީޖަސްއަށް ކުރިލިބުނީ ލަނޑުގެ ތަފާތުންނެވެ. މި ގްރޫޕްގެ ފުލުގައި އޮތް އިރު ވެއްޔަށް ޕޮއިންޓެއް ލިބިފައެއް ނުވެއެވެ.

ސެމީގެ ސީދާ ޖާގައެއް ކަނޑިންމަ އާއި ސެއިންޓް ރީޖަސް ހޯދިއިރު، ގްރޫޕް އޭ އިން ދެވަނައަށް ދިޔަ ވިލު ރީފް ޖެހޭނީ ޕްލޭއޮފް މެޗުގައި ގްރޫޕް ބީގެ ތިންވަނައަށް ދިޔަ ނިޔާމައާ ބައްދަލުކުރާށެވެ. އަދި ގްރޫޕް ބީ އިން ދެވަނައަށް ދިޔަ ވެލާވަރު ޖެހޭނީ ޕްލޭއޮފް މެޗުގައި ގްރޫޕް އޭގެ ތިންވަނައަށް ދިޔަ އިރު ވެއްޔާ ބައްދަލުކުރާށެވެ. މި މެޗުތަކުން މޮޅުވާ ޓީމުތަކަށް ސެމީގެ ފަހު ދެ ޖާގަ ލިބިގެންދާނެ އެވެ.

ދ. ޒޯނުގެ ގްރޫޕް ސްޓޭޖުގެ ކުޅުން ނިމުނުއިރު، މި ޒޯނުގެ ފައިނަލް މެޗު އޮންނާނީ މި މަހުގެ 8 ވަނަ ދުވަހު އެވެ.

ރިސޯޓު ލީގުގެ ފަރާތުން ކޮންމެ އަހަރަކު ވެސް ކުރިޔަށްގެންދާ މި މުބާރާތް މި އަހަރު ވެސް ކުރިޔަށްދާނީ ފަސް ޒޯނަކަށް ބަހާލައިގެން ނެވެ. އެއީ ދ. ޒޯނުގެ އިތުރުން މިއަހަރު ކުޅުން ކުރިއަށްދާނީ ނޯތު މާލެ ޒޯނާއި، ބ. ޒޯނާއި، ސައުތު އަރި ޒޯން އަދި ސައުތު މާލެ ޒޯނެވެ.

އެއް މަސް ދުވަހަށް ދިގު ދެމިގެންދާ މި މުބާރާތުގައި މި އަހަރު 42 ރިސޯޓް ވާދަކުރާއިރު، 79 މެޗު ކުޅެވިގެންދާނެއެވެ.

މި މުބާރާތުގެ މި އަހަރު މީޑިއާ ޕާޓްނަރަކީ ރާއްޖެ ޓީވީ އެވެ. މުބާރާތުގެ ފަސް ޒޯންގެ ފައިނަލް މެޗު ރާއްޖެޓީވީން ވަގުތުން ގެނެސްދިނުމަށް ވަނީ ހަމަޖެހިފައެވެ.