އައްޑޫ ސިޓީގެ އެކި ސަރަހައްދުތަކުގައި ބީޗްތައް ހެދުމަށް އެންމެ އެކަށޭނެ ސަރަހައްދުތައް ހޯދުމަށް އޮޕްޝަންސް އެނަލިސިސްއެއް ހެދުމާއި، އަދި ޚިޔާރުކުރެވޭ ސަރަހައްދުތަކާއި ބީޗްހެދުމަށާއި ވެލި ނަގާނެ ސަރަހައްދެއް ކަނޑައަޅައި އެސަރަހައްދުގެ އެންވަޔަރަންމަންޓް އެސެސްމަންޓް (އީއައިއޭ) ހަދައި ބީޗް ޑިޒައިން ކުރުމުގެ މަސައްކަތް ކުރުމަށް އައްޑޫ ސިޓީ ކައުންސިލާއި އޮމްނި ސޮލިއުޝަންސް ލިމިޓެޑާއި ދެމެދު އެއްބަސްވުމެއްގައި ސޮއިކޮށްފި އެވެ.
އައްޑޫ ސިޓީ ކައުންސިލުގެ އިދާރާގައި ބޭއްވި ރަސްމިއްޔާތެއްގައި ކައުންސިލުގެ ފަރާތުން އެއްބަސްވުމުގައި ސޮއިކުރެއްވީ ޑެޕިއުޓީ މޭޔަރ، މުހައްމަދު ޔަސްރިފް އެވެ. އަދި އޮމްނި ސޮލިއުޝަންސްގެ ފަރާތުން އެއްބަސްވުމުގައި ސޮއިކުރެއްވީ މުހައްމަދު ރިއާޟް އެވެ.
މިއެއްބަސްވުމުގެ ދަށުން ގައުކެނޑި ބްރިޖް ސަރަހައްދުގައި 200 މީޓަރުގެ ބީޗަކާއި އައްޑޫ ސިޓީގެ މީދޫ، ހުޅުދޫ އަދި ހިތަދޫގެ އިތުރުން ފޭދޫގެ ޓުއަރިޒަމް ޒޯނުތަކުގައި ބީޗްތައް ހެދުމަށް، އެސަރަހައްދުތަކުގައި އޮޕްޝަންސް އެނަލިސިސްއެއް ހެދޭނެއެވެ. އަދި މިމަރުހަލާއިން ޚިޔާރުކުރެވޭ ސަރަހައްދުތަކާއި ބީޗް ހެދުމަށާއި ވެލި ނަގާނެ ސަރަހައްދެއް ކަނޑައަޅައި އެސަރަހައްދުގެ އީއައިއޭ ހެދުމާއި، ފޭދޫ ސްވިމިންގ ޓްރެކް އެޅުމަށް ކަނޑައެޅިފައިވާ ސަރަހައްދު ފުން ކުރުމަށް އެސަރަހައްދުގެ އީއައިއޭވެސް ހެދުމަށް ވަނީ ހަމަޖެހިފައެވެ.
މީގެ އިތުރުން ބީޗް ހެދުމަށް އެންމެ އެކަށީގެންވާ ސައިޒު ކަނޑައަޅައި ބީޗް ޑިޒައިންކުރުމުގެ މަސައްކަތްވެސް މިއެއްބަސްވުމުގެ ދަށުން ކުރިއަށްދާނެއެވެ. މި މަޝްރޫއުގެ ޖުމްލަ އަގަކީ 922،200ރ. (ނުވަލައްކަ ބާވީސްހާސް ދުއިސައްތަ ރުފިޔާ) އެވެ.
