ސަރުކާރަށް ޖެއްސުންކުރުމުގެ ވިސްނުމުގައި ޤާނޫނުން ބޭރުން އެންޓި ކޮރަޕްޝަން ކޮމިޝަން (އޭސީސީން)އިން ބައެއް ކަންތައްތައް ކުރަމުން ގެންދާކަމަށާއި އެ ފުރުޞަތެއް ނުދޭނެކަމަށް ސަރުކާރު ހިންގާ މައި ޕާޓީ އެމްޑީޕީގެ ޕާރަލަމެންޓަރީ ގްރޫޕް ލީޑަރު އަދި މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގުރާމުގައި ވާހަކަ ދައްކަވަމުން އާޒިމް ވިދާޅުވީ، ނިމިދިޔަ 7 އަހަރު ތެރޭގައި ވެރިއަކަށް ހުންނެވި ބޭފުޅެއްގެ މުށުތެރޭގައި އޮތް މިނިވަން މުއައްސަސާތަކަށް ކުރެވުނު ކަމެއް ނެތްކަމަށާއި، އެއާއި ޚީލާފަށް މި ސަރުކާރުން ފެންނަ މަންޒަރު ތަފާތުވާނެކަމަށެވެ. އެގޮތުން، އޭސީސީން ނިކުމެ ސަރުކާރާއި އިދެކޮޅަށް ބަސްބުނަމުން ގެންދާކަން ފާހަގަކޮށް އާޒިމް ވިދާޅުވީ އެ ފާރާތްތަކަށް އެ ފުރުޞަތު އޮންނާނެކަމަށާއި މިނިވަން މުއައްސަސާއަކަށް މި ސަރުކާރަކުން ނުފޫޒެއް ނުފޯރުވާނެކަމަށެވެ. އާޒިމް ވިދާޅުވީ ސަރުކާރު ހިންގުމަށް ޖެއްސުންކުރުމުގެ ވިސްނުމުގައި ޤާނޫނުން ބޭރުން އޭސީސީން ބައެއް ކަންތައް ކުރަމުން ގެންދާކަމަށާއި އެ ފުރުޞަތު ދީގެން ނުތިބޭނެކަމަށެވެ. އަދި އެކަންކުރަނީ އޭސީސީގެ ތެރެއިން ކޮންބައެއްތޯ ބަލާ ފިޔަވަޅު އަޅުއްވާނެކަމަށެވެ.
އަޅުގަނޑުމެން ބުނަނީ ގާނޫނާއި އެއްގޮތަށް ކަންކަން ކުރާށޭ. ގާނޫނުގައި އޭސީސީއަށް ލިބިފައިވާ ބާރާއި އެއްގޮތަށް ކަންތައް ކުރާށޭ. ގަނޫނުން ބޭރުން އޭސީސީން ބައެއް ކަންތައްތައް އެބަކުރޭ. މިސާލަކަށް ސަރުކާރު ހިންގުމަށް ޖެއްސުންކުރުމުގެ ވިސްނުމުގައި އެއީ އަޅުގަނޑު ގަބޫލުކުރާނެކަމެއް ނޫން. އަޅުގަނޑުމެން އެ ފުރުސަތު ދީގެން ނުތިބޭނަން. މީގެ މާނައަކީ އޭސީސީގެ މެމްބަރުން ވަކިކޮށް ކަނޑާލާނީއެއް ނޫން. އެކަންކަން ކުރަނީ އޭސިސީގެ ތެރެއިން ކޮންބައެއް ތޯ ބަލައި އެމީހުންނާއި ދޭތެރޭ ފިޔަވަޅު އަޅަންޖެހޭނެ. މުޅި ކޮމިޝަން ކަނޑާލުމަކީ ހައްލެއް ނޫންތާ ދެއްތޯމެދު ހެންވޭރު ދާއިރާގެ މެމްބަރު އަލީ އާޒިމް
އާޒިމް ވިދާޅުވީ ކޮރަޕްޝަނުގެ މައްސަލަ ބެލުމަށްކަމަށް ބުނެ، ސަރުކާރު ދާ ސްޕީޑް ލަސްކުރުމަށް ބައެއް މަޝްރޫޢުތަކުގެ ހިންގުން އޭސީސީން ހުއްޓުވާކަމަށެވެ. އެ ވިސްނުމުގައި އޭސީސީގެ އެއް މެންބަރަކު ނުވަތަ ދެ މެންބަރަކު ކޮށްފާނެކަމަށް އާޒިމް ވިދާޅުވިއެވެ. އިތުރަށް ވާހަކަ ދައްކަވަމުން އާޒިމް ވިދާޅުވީ އޭސީސީގެ ޤާނޫނުގައި ވާގޮތުން މަޝްރޫޢުތައް ހުއްޓުވުމުގެ ބާރެއް އެ ފަރާތަކަށް ނޯންނަކަމަށެވެ. ނަމަވެސް ކޮރަޕްޝަނުގެ މައްސަލައެއް ބަލައި، އެ މީހަކާމެދު ފިޔަވަޅު އެޅިދާނެކަމަށެވެ. އޭސީސީން އެކަން ކުރަމުން ދަނީ ރައީސް ޔާމީނުގެ ބަޔަކުު ފަހަތުގައި ތިބެ، ސަރުކާރުން ހިންގާ މަޝްރޫޢު ހުއްޓުވުމަށް ޤަސްތުގައި ކަމަށް އާޒިމް ވިދާޅުވިއެވެ.
އޭސީސީގެ ގަނޫނު ބުނާގޮތުން ޕްރޮޖެކްޓް ހުއްޓުވުމުގެ ބާރެއް އެ ކޮމިޝަނަކަށް ނޯވޭ. އެ މައްސަލަ ބަލާފައި އެމީހަކާ ދޭތެރޭ ފިޔަވަޅު އަޅަންޖެހެނީ. އެއާއި ހިލާފަށް ގުޅަލާފައި މި ބުނަނީ، ނޫނިއްޔާމުން ސިޓީއެއް މި ފޮނުވަނީ ތީތި އިހަށް ހުއްޓާލާށޭ ތިމަންނާމެން މައްސަލަ ބަލަނީއޭ. ނޫން. އެއީ ގަސްތުގައި ކުރާކަމެއް. ރާވައިގެން. ރައީސް ޔާމީންގެ ބަޔަކުު ފަހަތުގައި ތިބެގެން ކުރާކަމެއް އަޅުގަނޑުމެން ސަރުކާރުން ހިންގާ ޕްރޮޖެކްޓް ހުއްޓުވުމަށްކަމަށް.މެދު ހެންވޭރު ދާއިރާގެ މެމްބަރު އަލީ އާޒިމް
އޭސީސީން ދާދި ފަހުން ވަނީ، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އެމްޑީޕީގެ އެކްޓިވިސްޓުންނާއި ބައްދަލުކުރައްވަން ކުރައްވާ އަމިއްލަފުޅު ދަތުރުތަކުގައި ދައުލަތުގެ މުވައްޒަފުންނާއި ވަޞީލަތްތައް ބޭނުންކުރައްވައިގެން ރަސްމީ ދަތުރެއްގެ ގޮތުގައި މަޖިލީހުގެ ރަސްމީ މީޑިއާ ބޭނުންކޮށްގެން ކަވަރު ކުރަމުންދާ މައްސަލައެއް ބަލައި، މި މައްސަލައާއި ގުޅިގެން "އިޞްލާޙު ކުރުމަށް އަންގާ އެންގުން" ފޮނުވާފައެވެ. އެގޮތުން މަހާސިންތާގެ ޕްރޮގުރާމުތަކުގެ ތެރޭގައި ނުހިމެނޭ ކަންކަމުގައި ބައިވެރިވުމަށް ފުވައްމުލަކު ސިޓީއާއި އައްޑޫ ސިޓީއަށް ދަތުރުކުރުމުގެ ސަބަބުން ޓިކެޓަށް އިތުރަށް ޚަރަދުކޮށްފައިވާ 444 (ހަތަރު ސަތޭކަ ސާޅީސް ހަތަރެއް) ރުފިޔާ ދައުލަތަށް އަނބުރާ ހޯދުމަށް އެ ކޮމިޝަނުން އަންގާފައިވެއެވެ.
