ފަހަތުން އަރައި ސުޕަ ޔުނައިޓެޑް ސްޕޯޓްސް ބަލިކޮށް، ދެވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން ކްލަބު ވެލެންސިއާ ހޯދައިފި އެވެ.
މި މުބާރާތުގެ ފައިނަލަށް ވެލެންސިއާ އާއި ސުޕަ ޔުނައިޓެޑް ސްޕޯޓްސް ދަތުރުކުރުމުން އެ ދެޓީމު ވަނީ އަންނަ ސީޒަނުގެ ފުރަތަމަ ޑިވިޝަނަށް ކޮލިފައިވެފައެވެ. ދެވަނަ ޑިވިޝަނުގެ ފައިނަލަށް ދާ ދެ ޓީމަށް، އަންނަ ސީޒަނުގެ ފުރަތަމަ ޑިވިޝަނުން ޖާގަ ލިބޭގޮތްވީ ސަސްޕެންޝަނުގެ ސަބަބުން ނިއުރޭޑިއަންޓް ސްޕޯޓްސް ކްލަބާއި ވިކްޓަރީ ސްޕޯޓްސް ކްލަބު ދެވަނަ ޑިވިޝަނަށް ވެއްޓުމުންނެވެ. ކުރިން ގަވާއިދުގައި އޮންނަނީ ދިވެހި ޕްރިމިއާ ލީގުގެ އެންމެ ފުލަށް ދާ ދެ ޓީމާއި ދެވަނަ ޑިވިޝަނުގެ ފައިނަލުގައި ކުޅޭ ދެ ޓީމު މެދުގައި ލީގު ބުރެއް ކުޅުމަށް ފަހު، އެންމެ ގިނަ ޕޮއިންޓު ހޯދާ ދެ ޓީމެއް ފުރަތަމަ ޑިވިޝަނަށް އަންނަ ގޮތަށެވެ.
ބުރާސްފަތި ދުވަހުގެރޭ ގައުމީ ފުޓްބޯލަ ދަނޑުގައި ކުޅުނު ފައިނަލް މެޗުން ސުޕަ ޔުނައިޓެޑް ސްޕޯޓްސް އަތުން ވެލެންސިއާ މޮޅުވީ 3-1 އިންނެވެ. މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ސުޕަ ޔުނައިޓެޑް ސްޕޯޓްސްއިންނެވެ. މެޗުގެ 27 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ އާދަމް ނިޒާމް އެވެ.
އެކަމަކު ފުރަތަމަ ހާފު ނިމުމުގެ ކުރިން ވެލެންސިއާއިން ވަނީ ނަތީޖާ އެއްވަރުކޮށްފައެވެ. މެޗުގެ 38 ވަނަ މިނެޓުގައި ހުސެއިން ނިޔާޒް މުހައްމަދު (ބޮކުރީ) ދިން ޕާހަކުން މި ލަނޑު ކާމިޔާބުކޮށްދިނީ ބިދޭސީ ފޯވާޑް އައިރީ ސަމިއުލް އެވެ.
އަދި ދެވަނަ ހާފު ފަށައިގެން ފަސްވަނަ މިނެޓުގައި ހުސެއިން ފައިސަލްގެ އެހީއާއެކު ކެޕްޓަން އަބްދުﷲ މިދުހަތު ފަހުމީ (ބިޗަޑް) ވަނީ ވެލެންސިއާއަށް ލީޑު ނަގާދީފައެވެ. އަދި އެޓީމުން ލީޑު ފުޅާކުރީ މެޗު ނިމެން މިނެޓަކަށް ވެފައިވަނިކޮށް އައިރީ ސެމިއުލް ކާމިޔާބުކުރި ލަނޑުންނެވެ.
މެޗަށްފަހު ވެލެންސިއާގެ ކޯޗު އިސްމާއިލް އާސިފު (ކުޑަ ހީނާ) ބުނީ އަލުން ދެވަނަ ޑިވިޝަނަށް ވެލެންސިއާ ގެންދިޔުމަށް ޓީމުގެ މެނޭޖުމަންޓުން ވަރަށް ބުރަ މަސައްކަތްތަކެއް ކުރި ކަމަށެވެ. އަދި ފައިނަލް މެޗުގައި ފަހަތުން އަރައި މޮޅުވީ ކުޅުންތެރިން ކުރި ބުރަ މަސައްކަތުން ކަމަށް ވަނީ ބުނެފައެވެ.
އެއް އަހަރުގެ މެދު ކެނޑުމަކަށްފަހު ވެލެންސިއާ ފުރަތަމަ ޑިވިޝަނަށް ކޮލިފައިވިއިރު، އެޓީމަކީ 1979 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ފުރަތަމަ ޑިވިޝަނުގައި ވާދަކުރި ޓީމެކެވެ.
މިއަހަރުގެ ދެވަނަ ޑިވިޝަން ފުޓްބޯޅަ މުބާރާތުގެ ފެއާޕްލޭ ޓީމަކަށް ހޮވުނީ މަހުބަދޫ ސްޕޯޓްސް ކްލަބެވެ. އެންމެ މޮޅު ގޯލްކީޕަރަކަށް ވެލެންސިއާގެ މުހައްމަދު ޖަޒްލާން ހޮވުނުއިރު، މުބާރާތުގެ އެންމެ މޮޅު ކުޅުންތެރިއަކީ ސުޕަ ޔުނައިޓެޑް ސްޕޯޓްސްގެ އާދަމް ނިޒާމެވެ.