ކުރިއަށް އޮތް ދެ އަހަރު ޔޫރަޕްގެ މުބާރާތްތަކުގައި ނުކުޅެވޭ ގޮތަށް މެންޗެސްޓާ ސިޓީ ސަސްޕެންޑްކުރުމާ ގުޅިގެން، އެ ޓީމުގެ ކޯޗު ޕެޕް ގާޑިއޯލާގެ މުސްތަގުބަލާ މެދު ސުވާލުތަކެއް އުފެދިއްޖެ އެވެ.

މެންޗެސްޓާ ސިޓީން ފައިނޭންޝިއަލް ފެއާޕްލޭ (އެފްއެފްޕީ)ގެ އުސޫލުތަކާ ހިލާފުވުމުގެ އިތުރަށް ޔުއެފާ ކްލަބު ލައިސަންސިންގައި މަކަރު ހަދާފައި ވާތީ ހުކުރު ދުވަހުގެރޭގެ ވަގުތެއްގައި ޔުއެފާއިން ވަނީ ސިޓީއަށް ބޮޑު އަދަބެއް ދީފައެވެ.

އެގޮތުން ކުރިއަށް އޮތް ދެ ސީޒަނަށް ޔޫރަޕްގެ މުބާރާތްތަކުން ސިޓީ ސަސްޕެންޑްކުރުމާއެކު، 2020/2021 އަދި 2021/2022 ވަނަ އަހަރުގެ ސީޒަނުގެ ޗެމްޕިއަންސް ލީގުގައި އެޓީމަށް ނުކުޅެވޭނެ އެވެ. މީގެ އިތުރުން ޔުއެފާއިން ވަނީ ސިޓީ 25 މިލިއަން ޕައުންޑުން ޖޫރިމަނާވެސް ކޮށްފައެވެ.

ސިޓީ އަށް މި އައި އަދަބާ ގުޅިގެން އެ ޓީމުގެ ކޯޗު ޕެޕް ގާޑިއޯލާގެ މުސްތަގުބަލާ މެދު ވަނީ ސުވާލު އުފެދިފަ އެވެ. ސިޓީ އަށް ސަސްޕެންޝަނެއް އަތުވެއްޖެ ނަމަ ގާޑިއޯލާ އެ ކްލަބުގައި މަޑުނުކުރާނެ ކަމަށް މީޑިއާގައި މީގެ ކުރިން ވެސް ވަނީ އަޑުފެތުރިފައެވެ. ގާޑިއޯލާ ހޯދަން އޭނާގެ ކުރީގެ ކްލަބު ބާސެލޯނާ އާއި އިޓަލީގެ ޗެމްޕިއަން ޔުވެންޓަސް އިން އަންނަނީ މަސައްކަތް ކުރަމުންނެވެ.

މީގެ ކުރިން ގާޑިއޯލާ ވަނީ މި ސީޒަނުގައި ސިޓީއާއެކު ޗެމްޕިއަންސް ލީގު ކާމިޔާބުނުކުރެވިއްޖެ ނަމަ، އެ ޓީމުން އޭނާ ވަކިކުރުމުގެ ފުރުސަތު އެބައޮތް ކަމަށްވެސް ބުނެފައެވެ. ސިޓީއާއެކު މިހާތަނަށް ފަސް ތަށި ކާމިޔާބުކޮށްފައިވާ ގާޑިއޯލާ ވަނީ އެޓީމާއެކު ގިނަ ރެކޯޑުތަކެއް ހަދާފައެވެ. އެކަމަކު ގާޑިއޯލާއަށް ސިޓީއާއެކު ޗެމްޕިއަންސް ލީގު ތައްޓެއް މިހާތަނަށް ހޯދިފައެއް ނުވެއެވެ.

ރިޕޯޓުތައް ބުނާ ގޮތުން ސިޓީގެ ސަސޕެންޝަނާ ގުޅިގެން ކުރިއަށް އޮތް ސީޒަނުގައި ގާޑިއޯލާ އެޓީމުގައި މަޑެއް ނުކުރާނެ އެވެ. އަދި މީގެ އިތުރަށް އެޓީމުގެ ބައެއް ކުޅުންތެރިން ޓީމު ދޫކޮށްލުން ގާތް ކަމަށްވެސް ވަނީ ބުނެފައެވެ.

ފައިނޭންޝިއަލް ފެއާޕްލޭ (އެފްއެފްޕީ) ގަވާއިދާ ސިޓީން ހިލާފުވި މައްސަލަ ޔުއެފާއިން އަލުން ބަލަން ފެށީ ޖަރުމަނުގެ މީޑިއާއެއް ކަމަށްވާ ޑިއާ ސްޕީގަލް އިން ލީކުކޮށްލި ސިއްރު ލިޔެކިއުންތަކެއްގެ ސަބަބުންނެވެ. އެ ލިއެކިޔުންތަކުގައިވާ ގޮތުން ސިޓީން އަންނަނީ ޔުއެފާގެ ބައެއް އޮފިޝަލުންތަކަކަށް ރިޝްވަތުދީގެން ތަކުރާރުކޮށް އެފްއެފްޕީ ގަވާއިދާ ހިލާފުވަމުންނެވެ.

ޔުއެފާގެ ފައިނޭންޝިއަލް ކޮންޓްރޯލް ބޯޑާއި މައްސަލަތައް ތަހުގީގުކުރާ ޕެނަލުން ހިންގި ސީރިއަސް އޮޕަރޭޝަންތަކަށް ފަހު އެނގިގެންދިޔައީ ސިޓީން ކްލަބަށް ޚަރަދުކުރުމުގައި އެންމެ ބޮޑަށް ބޭނުންކުރަނީ ސްޕޮންސަރުގެ ފައިދާ ފައިސާ ކަމެވެ.

އެ މައްސަލައިގައި ސިޓީ ސަސްޕެންޑްކުރިއިރު، ސިޓީން މި މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް)ގައި އެޕީލް ކުރާނެ އެވެ.

އެފްއެފްޕީ ގަވާއިދާ ހިލާފުވެގެން ޔުއެފާއިން މީގެ ކުރިން ވެސް ވަނީ ސިޓީ އަށް 2014 ވަނަ އަހަރު އަދަބު ދީފައެވެ. އެ ފަހަރު 49 މިލިއަން ޕައުންޑުން ޖޫރިމަނާ ކުރުމަށް ފަހު، އެ އަހަރުގެ ޗެމްޕިއަންސް ލީގުގައި ސިޓީގެ ސްކޮޑު މަދުކުރަން ނިންމިއެވެ.