އެއިންޓްރެކްޓް ފްރެންކްފަޓް 4-0 އިން ބަލިކޮށް ޖަރުމަން ލީގުގެ ދެވަނައަށް ބޮރޫޝިއާ ޑޯޓްމުންޑް ޖެހިލައިފި އެވެ.

ލީގުގައި ހުކުރު ދުވަހުގެރޭ އަމިއްލަ ދަނޑުގައި ކުޅުނު މެޗުން ޑޯޓްމުންޑް މޮޅުވީ 4-0 ގެ ނަތީޖާއަކުންނެވެ. މި މެޗުން މޮޅުވެ ޑޯޓްމުންޑް ދެވަނަ އަށް ޖެހިލީ 22 މެޗުން 42 ޕޮއިންޓު ހަމަކޮށްގެންނެވެ. ތިންވަނައިގައި އޮތް އާރުބީ ލެއިޕްޒީގަށްވެސް ހަމަ އެ އަދަދަށް ޕޮއިންޓު ލިބިފައިވީ ނަމަވެސް، އެޓީމަށް އެއް މެޗު މަދެވެ. ޑޯޓްމަންޑަށް ދެވަނަ ލިބެނީ ފައިދާ ލަނޑުގެ ތަފާތުންނެވެ. އެހެންކަމުން ލީގުގައި ހޮނިހިރު ދުވަހު ވާޑާ ބްރޭމަންގެ މައްޗަށް ކުރިހޯދާ ދެވަނައަށް އަލުން އެރުމުގެ ފުރުސަތު ލެއިޕްޒީގަށް އެބައޮތެވެ.

ޑޯޓްމުންޑުގެ ދަނޑުގައި ހުކުރު ދުވަހުގެރޭ ކުޅުނު މެޗުގައި އެޓީމުން ލީޑު ނެގީ 33 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ލޫކަސް ޕިޒްޝެކް އެވެ. އަދި ދެވަނަ ހާފު ފަށައިގެން ހަތަރުވަނަ މިނެޓުގައި ޖޭޑަން ސާންޗޯ ވަނީ ޑޯޓްމުންޑަށް ލީޑު ފުޅާކޮށްދީފައެވެ. މި ލަނޑަކީ ސާންޗޯ އެންމެ ފަހުން ކުޅުނު 14 މެޗުގައި ކާމިޔާބުކުރި 12 ވަނަ ލަނޑެވެ.

ޑޯޓްމަންޑުގެ ތިންވަނަ ލަނޑު 54 ވަނަ މިނެޓުގައި ކާމިޔާބުކޮށްދިނީ ޖެނުއަރީ މަހު އެޓީމާ އަލަށް ގުޅުނު ޒުވާން ފޯވަރޑް އާލިންގް ހާލަންޑު އެވެ. މިއީ ހާލަންޑު ޑޯޓްމުންޑަށް ކުޅެދިން ހަވަނަ މެޗުގައި ޖެހި ނުވަވަނަ ލަނޑެވެ. ރޭގެ މެޗުގައި ޑޯޓްމުންޑުން ޖެހި ހަތަރުވަނަ ލަނޑު މެޗުގެ 74 ވަނަ މިނެޓުގައި ކާމިޔާބުކޮށްދިނީ ރަފައެލް ގުއަރޭރޯ އެވެ.

ލީގުގައި ދެން ޑޯޓްމުންޑް މެޗެއް ކުޅޭނީ މި މަހުގެ 22 ވަނަ ދުވަހުއެވެ. އެދުވަހު ޑޯޓްމުންޑް ނުކުންނާނީ ވާޑާ ބްރޭމަންއާ ދެކޮޅަށެވެ.