ޓެނިސް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބާއްވާ އަށްވަނަ މޭރީބްރައުން ޓެނިސް ޗެމްޕިއަންޝިޕްގެ ކުޅުން ބުރާސްފަތި ދުވަހު ފަށައިފި އެވެ.

މުބާރާތް ހުޅުވުމުގެ ގޮތުން ބުރާސްފަތި ދުވަހުގެ ހަވީރު ވަނީ ހާއްސަ ރަސްމިއްޔާތެއް ބާއްވާފައެވެ. މިއަހަރުގެ މުބާރާތްވެސް ރާވާ ކުރިއަށްގެންދަނީ އަކޫ އެކަޑަމީންނެވެ. މިއީ ޓެނިސް އެކަޑަމީއަކުން މިފަދަ މުބާރާތެއް ރާވާ ދެވަނަ ފަހަރެވެ. މިދިޔަ އަހަރުގެ މުބާރާތްވެސް ރާވާ ކުރިއަށްގެންގޮސްފައިވަނީ އަކޫ އެކަޑަމީންނެވެ.

މިއަހަރުގެ މުބާރާތުގައި 105 ކުޅުންތެރިން ވާދަކުރާ ކަމަށް ޓެނިސް އެސޯސިއޭޝަނުން މައުލޫމާތުދެއެވެ. އެއީ ފިރިހެން 48 ކުޅުންތެރިންނާއި އަންހެން 57 ކުޅުންތެރިންނެވެ.

މިއަހަރުގެ މުބާރާތުގައިވެސް ކުރިއަށްދާނީ 8 އަހަރުން ދަށާއި، 10 އަހަރުން ދަށާއި، 12 އަހަރުން ދަށާއި، 14 އަހަރުން ދަށާއި، 18 އަހަރުން ދަށާއި، 45 އަހަރުން މަތީގެ ސިންގަލްސް އަދި ޑަބަލްސް ބައިގެ ކުޅުމެވެ.

ޓެނިސް އެސޯސިއޭޝަނުން ބުނީ މި މުބާރާތުގެ ސަބަބުން އުމުރުފުރާތަކުގެ މެދުގައި އޮންނަ ވާދަވެރިކަން އިތުރުވެ ކުދިންގެ ކުޅުމުގެ ފެންވަރު ރަނގަޅު ކުރުމަށް އެހީތެރިވެދިނުމުގެ އިތުރުން ޓެނިހުގެ މަގުބޫލުކަން އިތުރުވެގެންދާ ކަމަށެވެ.