ކްލަބު ގްރީން ސްޓްރީޓްސްގެ ކޯޗުގެ މަގާމަށް އަލީ ނިސްތާރު މުހައްމަދު ހަމަޖައްސައިފި އެވެ.
ގްރީންއިން އެޓީމުގެ ކޯޗަކަށް ނިސްތާރު ހަމަޖެއްސީ އެޓީމާއެކު ތަޖުރިބާކާރު ކޯޗު އަލީ ސުޒޭން ހަދާފައިވާ އެއްބަސްވުން ދެ ފަރާތް އެއްބަސްވެގެން އުވާލުމާއި ގުޅިގެންނެވެ. ސުޒޭން މިހާރު މަސައްކަތް ކުރަމުން އަންނަނީ ގައުމީ ފުޓްބޯޅަ ޓީމުގެ އެސިސްޓަންޓް ކޯޗުގެ ގޮތުގައެވެ.
ގްރީންގެ ކޯޗަކަށް ނިސްތާރު ހަމަޖެއްސިއިރު، 2017 ވަނަ އަހަރުގެ ސީޒަނުގައި އއ. މާޅޮސް ގޮވައިގެން ދިވެހި ޕްރިމިއާ ލީގަށް އައިސް ނިސްތާރު ވަނީ ރަނގަޅު މަސައްކަތްތަކެއް ކޮށްފައެވެ. އެއަށްފަހު 2018 ވަނަ އަހަރު ނިސްތާރު ބަދަލުވީ ފޯކައިދޫ ފުޓްބޯލް ކްލަބަށެވެ. އެޓީމުން މިއަހަރުގެ ދިވެހި ޕްރިމިއާ ލީގު ނިންމާލީ ހަވަނައިގައި އޮވެއެވެ.
ނިސްތާރު ގްރީންއާ ހަވާލުވިއިރު، ގްރީންއަށް މި ސީޒަނުގައި އަދި ބާކީ ދެ މުބާރާތް އެބައޮތެވެ. އެއީ އެފްއޭ ކަޕާއި ޕްރެޒިޑެންޓްސް ކަޕް އެވެ.
މިފަހަރުގެ ސީޒަނާ ވަރުގަދަ ސްކޮޑަކާއެކު ގްރީންއިން ކުރިމަތިލި ނަމަވެސް، މާލީ ގޮތުން ދިމާވި ދަތިތަކާއެކު އެ ކްލަބުން ވަނީ ބައެއް ކުޅުންތެރިން ދޫކޮށްލާފައެވެ. މިފަހަރުގެ ދިރާގު ދިވެހި ޕްރިމިއާ ލީގު ގްރީންއިން ނިންމާލީ ހަތަރުވަނައިގައެވެ.
