ކުރިއަށް އޮތް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބުގައި މިހާރުވެސް އެ އިދާރާގެ ރައީސް ބައްސާމް އަދީލް ޖަލީލަށް ތާއީދުކުރުމަށް މާޒިޔާ ސްޕޯޓްސް އެންޑް ރެކްރިއޭޝަނުން ނިންމައިފި އެވެ.

އަންގާރަ ދުުވަހު އެފްއޭއެމްގެ ރައީސް ބައްސާމް ވަނީ އެ އިދާރާގެ އިންތިޚާބު އަވަސް ކުރުމަށް އެފްއޭއެމްގެ ހިންގާ ކޮމެޓީއަށް ހުށަހަޅުއްވައި، އެކަމަށް ހިންގާ ކޮމެޓީން އެއްބަސްވެފައިވާކަން އިޢުލާނުކުރައްވާފައެވެ. އެހެންކަމުން ކުރިޔަށް އޮތް 45 ދުވަހުގެ ތެރޭގައި އެފްއޭއެމްގެ އިންތިޚާބު ބާއްވަން ހިންގާ ކޮމެޓީން ނިންމާފައިވާ ކަމަށް ބައްސާމް ވިދާޅުވި އެވެ.

މާޒިޔާއިން ކުރި ޓްވީޓެއްގައި ބުނެފައިވަނީ ކުރިއަށް އޮތް އިންތިޚާބުގައިވެސް ބައްސާމަށް ތާއީދުކުރުމަށް އެ ކްލަބުން ނިންމާފައިވާ ކަމަށެވެ. އަދި އެ އިދާރާގެ ރައީސްގެ މަގާމަށް އެންމެ ހައްގު ބޭފުޅަކީ ބައްސާމް ކަމަށާއި، އޭނާއަށް ދެވަނަ ދައުރެއް ދިނުން ހައްގު ކަމަށްވެސް ވަނީ ބުނެފައެވެ.

އެފްއޭއެމްގެ ރައީސް ބައްސާމްގެ ފުރަތަމަ ދައުރު ހަމަވާނީ މިއަހަރުގެ ނޮވެންބަރު މަހުގެ 20 ވަނަ ދުވަހު އެވެ. އެފްއޭއެމްގެ އިންތިޚާބު ނޮވެންބަރު 20 ގެ ކުރިން ބާއްވަން އެއެސޯސިއޭޝަންގެ ހިންގާ ގަވައިދުގައި ބުނެއެވެ.

އެފްއޭއެމްގެ ރައީސްގެ މަގާމުން ބައްސާމް ވަކިކުރުމަށް ނިމިދިޔަ އަހަރު ބައެއް ކްލަބުތަކުން މަސައްކަތް ކޮށްފައިވާއިރު، އޭގެ ތެރޭގައި ރާއްޖޭގެ އެންމެ ބޮޑު ދެ ކްލަބު ކަމަށްވާ ނިއުރޭޑިއަންޓް ސްޕޯޓްސް ކްލަބާއި، ވިކްޓަރީ ސްޕޯޓްސް ކްލަބު ހިމެނެއެވެ. އެކަމަކު އެ ދެ ކްލަބުން މިހާރު ވަނީ ފުޓްބޯޅައިގެ ހުރިހާ ހަރަކާތްތަކުން ސަސްޕެންޑް ކޮށްފައެވެ.