އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީއަށް ކާމިޔާބުކަމާއިއެކު ސީޒަންއެއް ނިންމި ކަމަށްވާނީ ޗެމްޕިއަންސް ލީގު ކާމިޔާބު ކުރުމުން ކަމަށް އިންގްލޭންޑްގެ ކުރީގެ ކުޅުންތެރިޔާ އިއަން ރައިޓް ބުނެފިއެވެ.

މަޝްހޫރު ކުޅިވަރު މީޑިއާ ބީބީސީއަށް ދިން އިންޓަރވިއުއެއްގައި އިއަން ބުނީ ސިޓީ އިނގިރޭސި ވިލާތުގައި ކާމިޔާބު ހޯދައިފި ކަމަށާއި އެޓީމަށް މިހާރު މަދުވަނީ ޗެމްޕިއަންސް ލީގު ކަމަށެވެ. ސިޓީގެ ކޯޗު ޕެޕް ގާޑިއޯލާ އަކީ ޗެމްޕިއަންސް ލީގާއި ރައްޓެހި ކޯޗެއް ކަމަށް ބުނަމުން އިއަން ބުނީ ސިޓީއިން ޗެމްޕިއަންސް ލީގު ހޯދަން ބޭނުންނަމަ އެ ފުރުސަތު އޮތީ ޕެޕް އާއިއެކު ކަމަށެވެ. މީގެ އިތުރުން އިއަން ބުނީ ސިޓީ އިން ޗެމްޕިއަންސް ލީގުގެ ގަދަ 16 ގައި ވާދަކުރަން ޖެހެނީ ޗެމްޕިއަންސް ލީގުގައި އެންމެ ކާމިޔާބު ކޯޗު އަދި ޓީމާއި ދެކޮޅަށް ކަމަށެވެ. އެހެން ކަމުން ރެއާލް މެޑްރިޑް ބަލިކޮށް ސިޓީއަށް ޗެމްޕިއަންސް ލީގުގެ ކުއާޓާ ފައިނަލްއަށް ދަތުރުކޮށްފިނަމަ މި މުބާރާތް ކާމިޔާބުކުރުމުގެ ފުރުސަތު ސިޓީއަށް ބޮޑު ކަމަށެވެ.

ސިޓީގައި މިވަގުތު ތިބި ކުޅުންތެރިންނަކީ މޮޅު ކުޅުންތެރިން ކަމަށާއި، ޔޫރަޕްގެ ކޮންމެ ޓީމަކަށް ވެސް ސިޓީ ބަލިކުރުން ވެގެންދާނީ އުނދަގޫ ކަމަކަށް ކަމަށާއި، ޕެޕް ސިޓީއާއިއެކު ތިން އަހަރު ހޭދަކޮށްފައި ހުރުމުން ސިޓީއަށް މިވަގުތު އެންމެ ބޭނުންވާ ކަންތައް އިނގޭނީ ޕެޕް އަށް ކަމަށް އިއަން ބުންޏެވެ.

ސިޓީއިން މިވަގުތު ޕްރިމިއާ ލީގުގެ ދެވަނައިގައި އޮތްއިރު އެންމެ ފަހުން ލީގުގައި ކުޅުނު މެޗުން ޓޮޓެންހަމް އަތުން ވަނީ 2-0 ގެ ނަތީޖާ އަކުން ބަލިވެފައެވެ. އިއަން ބުނީ އެމެޗުގައި ސިޓީއިން މޮޅަށް ކުޅުނު ކަމަށާއި ނަމަވެސް ސިޓީގައި މިވަގުތު އަނިޔަގެ މައްސަލަ ވަރަށް ބޮޑު ކަމަށެވެ. އަދި މި ވަގުތު ތާވަލުގެ އެއްވަނައިގައި އޮތް ލިވަޕޫލަށް މި ހާލަތު ދިމާވެއްޖެ ނަމަ އެޓީމުން އޮންނާނީ މިއަށްވުރެ ހާލު ދެރަކޮށްކަމަށް އިއަން ބުންޏެވެ.

ސިޓީގެ ކޯޗު ގާޑިއޯލާ ސިޓީއަށް ބަދަލުވުމަށްފަހު ފަސް ތަށި އެކްލަބާއިއެކު ކާމިޔާބުކޮށްފައިވާ ގާޑިއޯލާ ވަނީ ސިޓީ އާއިއެކު ގިނަ ރެކޯޑްތަކެއް ހަދައިފައެވެ. ނަމަވެސް ގާޑިއޯލާއަށް ސިޓީއާއިއެކު ޗެމްޕިއަންސް ލީގު ތައްޓެއް މިހާތަނަށް ހޯދިފައެއް ނުވެއެވެ. ކުރިން ބާސެލޯނާ އަދި ބަޔާންއަށް ކޯޗުކަން ކޮށްދިން ކޯޗު ވަނީ ބާސާ އަދި ބަޔާން އާއިއެކު ވެސް ކާމިޔާބީ ހޯދައިފައެވެ.

ސިޓީއިން ޗެމްޕިއަންސް ލީގު ގަދަ 16 ގައި ސްޕެއިންގެ ގަދަ ބާރު ރެއާލް މެޑްރިޑާއި ބައްދަލުކުރާނީ ފެބްރުއަރީ 26 ވަނަ ދުވަހު އެވެ.