ރާއްޖެއާއި ނުގުޅޭ ތަސްވީރުތައް ހުރި ފޮތްތަކެއް ދޫކުރެވެނީ ސްކޫލުގެ އިހުމާލުންކަމަށާއި މިނިސްޓްރި އޮފް އެޑިއުކޭޝަންގެ ދައުރެއް އަދި އިންޑިއާ ސަރުކާރުގެ އެއްވެސް ދައުރެއް ނެތްކަމަށް އަހުމަދިއްޔާ ސުކޫލުން ބުނެފިއެވެ.
އަހްމަދިއްޔާ އިންޓަރނޭޝަނަލް ސްކޫލުން ނެރުނު ބަޔާނެއްގައި ބުނެފައިވަނީ، ސޯޝަލް މީޑިއާގައި ދައުރުވަމުންދާ ފޮތުގެ ގަނޑުތަކަކީ ސްކޫލުން ދޫކުރާ ފޮތެއްގެ ތެރޭގައިހުރި ސަފްޙާ ތަކެއްކަމަށާއި ފޮތް ބެލެނިވެރިންނަށް ދޫކުރުމުގެ ކުރިން ފޮތުގައި ހުރި ރާއްޖެ އާއި ނުގުޅޭ ބައިތައްހުރި ސަފްޙާތައް ނަގާ އޭގެ ބަދަލުގައި ދިވެހި ޤައުމީ ސަލާމް އާއި ދިވެހި ދިދަ އާއި ދިވެހި ރާއްޖޭގެ ނިޝާން އާއި އަދި ދިވެހި ސަގާފަތް ދައްކުވައިދޭ ތަސްވީރުތައް ހިމެނޭ ސަފްޙާތަކެއް، އެ ސަފްޙާތަކުގެ ބަދަލުގައި ހިމަނައިގެން ދޫކުރެވޭފޮތްތަކެއްކަމަށެވެ. ނަމަވެސް ފޮތްތައް ދޫކުރުމުގައި އެފޮތްތަކުގެ ސަފްޙާތައް ބަދަލު ނުކޮށްހުރި ފޮތްތަކެއް ދޫކުރެވިފައިވާތީ އެފޮތްތައް އަބުރާ ސްކޫލަށް ގެންނަން އެންގާފައިވާކަމަށް ސުކޫލުން ބުންޏެވެ.
އެ ފޮތްތަކަކީ މިނިސްޓްރީ އޮފް އެޑިއުކޭޝަން އަދި އިންޑިއާ ސަރުކާރުން ސްކޫލަށް ދިން ފޮތްތަކެއްނޫންކަމަށް ބަޔާނުގައި ވަނީ ފާހަގަކޮށްފައެވެ. އެ ފޮތްތަކަކީ ސްކޫލުން އިންޑިއާގެ ކޭމްބްރިޖް ޔުނިވަރސިޓީ ޕްރެސް އާއިގުޅިގެން ރާއްޖެ ގެނެސް މިދިޔަ އަހަރުން ފެށިގެން ބޭނުން ކުރަމުން ގެންދާ ފޮތްތަކެއްކަން ފާހަގަކޮށް ބަޔާނުގައި އިތުރަށް ބުނެފައިވަނީ އެކަމުގައި މިނިސްޓްރި އޮފް އެޑިއުކޭޝަންގެ ދައުރެއް އަދި އިންޑިއާ ސަރުކާރުގެ އެއްވެސް ދައުރެއްނޯންނާނެކަމަށާއި، ބަދަލުނުކޮށް ހުރި ފޮތްތަކެއް ބެހުމުގެ ހުރިހާ ޒިންމާއެއް ސްކޫލުންނަގާކަމަށެވެ.
އަހުމަދިއްޔާ އިންޓަރނޭޝަނަލް ސްކޫލުން ވަނީ ބަދަލުނުކޮށް ހުރި ފޮތްތަކެއް ބެހުނު މައްސަލައިގައި އަޙްމަދިއްޔާގެ ބެލެނިވެރިންގެ ފަރާތުން ނިޙާޔަތައް މަޢާފަށް އެދެފައެވެ.
