އިންޑިއާ ސަރުކާރުގެ އެހީގަ އައްޑޫ ސިޓީގެ 3 އަވަށެއްގައި ޤާއިމުކުރުމަށް ހަމަޖެހިފައިވާ "ގޭދޮށު މަސް ޕްލާންޓް" ޤާއިމުކުރުމުގެ މަސައްކަތަށް ކޮންސަލްޓެންސީގެ ޚިދުމަތް ފޯރުކޮށްދޭނެ ފަރާތެއް ހޯދުމަށް ބީލަމަށް ހުޅުވާލައިފިއެވެ.

މިއީ ކޮންސަލްޓެންސީގެ ޚިދުމަތް ފޯރުކޮށްދިނުމަށް ބީލަން ހުށަހެޅުމަށް ފުރުޞަތު ހުޅުވާލި ދެ ވަނަ ފަހަރެވެ. އެކަމާ ގުޅޭގޮތުން އައްޑޫ ސިޓީ ކައުންސިލުން ބުނީ ކުރިން ކުރި އިޢުލާނަށް އެއްވެސް ފަރާތަކުން ބީލަން ހުށަހަޅާފައި ނުވާތީ އެ އިޢުލާން ބާޠިލުކޮށް އަލުން އެ މަސައްކަތްކުރުމަށް ފުރުޞަތު ހުޅުވާލާކަމަށެވެ.

މިހިނގާ ޖަނަވަރީ 06 ވާ ހޯމަ ދުވަހުގެ ހެނދުނު 10:00ން ފެށިގެން ޖަނަވަރީ 08 ވާ ބުދަ ދުވަހުގެ މެންދުރު 12:00 އާއި ހަމަޔަށް އައްޑޫ ސިޓީ ކައުންސިލް އިދާރާއިން ބިޑު ޑޮކިއުމަންޓް ބަލައިގަތުމަށް ވަނީ ހަމަޖެހިފައެވެ. އަދި ބީލަން ބަލައިގަތުމާއި، ބީލަން ހުޅުވުން އޮންނާނީ ޖަނަވަރީ 09 ވާ ބުރާސްފަތި ދުވަހުގެ 13:00ގައި ކައުންސިލް އިދާރާގެ ހޯލްުއިކަމަށްވެސް ކައުންސިލުން ބުނެއެވެ.

އެންމެ ފަހުން ފާސްކުރެވިގެންދިޔަ މަސްވެރިކަމުގެ ޤާނޫނުގައި ގޭދޮށު މަސް ޕްލާންޓް އެޅުމުގެ ކަންކަން ކުރިޔަށް ގެންދެވޭނެކަމަށް ވަނީ ބަޔާންކޮށްފައެވެ. މިސަރުކާރުން އަންނަނީ މަސްވެރިންނަށް ފަހި ގޮތްތަކެއް ހޯއްދަވައިދެއްވާނެ ކަމަށް ވަޢުދުވެ އެކަމަށް މަސައްކަތްތަކެއް ކުރައްވަމުންނެވެ. އެގޮތުން މަސްވެރިކަމުގެ ޤާނޫނަށް މިފަހުން ވަނީ ބޮޑެތި އިޞްލާޙުތަކެއް ގެނެސްފައެވެ.

އެ އިޞްލާޙުތަކުގެ ދަށުން މަސްވެރިންގެ ޙައްޤުތައް ރައްކާތެރިކޮށްދީ އެ ފަރާތްތަކަށް ހައްޤުވެގެންވާ އިޖުތިމާޢީ ރައްކާތެރިކަމާއި ޕެންޝަން ކަށަވަރު ކޮށްދިނުމަށްޓަކައި މަސްވެރިންނަށް ޕެންޝަނާއި، ޑިސްއެބިލިޓީ އިންޝުއަރެންސް ލިބިދެވޭ ސްކީމެއް، މިނިސްޓްރީގެ މަޝްވަރާގެ މަތިން މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އެކުލަވާލަން ޖެހެއެވެ.