ފަރަށް އެރި މުދާއުފުލާ ދޯންޏެއްގެ ކެޕްޓަނަކަށް ހުރި ދިވެއްސަކު ގެއްލިގެން ހޯދަން ފަށައިފިއެވެ.

މޯލްޑިވްސް ނެޝަނަލް ޑިފެންސް ފޯރސް(އެމްއެންޑީއެފް) އިން ބުނީ ތިން މީހުންނާއެކު މުދާ އުފުލި ދޯންޏެއް ކ. ކަގި ފަރަށް އަރާ، މިޙާދިސާގައި އެދޯނީގައި ހުރި 37 އަހަރުގެ ދިވެހި މީހާ ގެއްލިގެން އުޅޭ ކަމުގެ ރިޕޯޓު ލިބުނީ ހޯމަ ދުވަހުގެ ހެނދުނު 8:09 ގައި ކަމަށެވެ. އަދި އެ ދިވެހި މީހާ ގެއްލުނުއިރު ދަބަހާއި ފޯނު ދޯނީގައި އޮތް ކަމަށް އެމްއެންޑީއެފުން މަޢުލޫމާތުދެއެވެ.

އެމްއެންޑީއެފުން ބުނީ ފަރަށް އެރި ޓީޓީއެސް ފާން ނަމަކަށް ކިޔާ މިދޯނީގައި ދެން ތިބީ ދެ ބިދޭސީން ކަމަށެވެ.

މިހާރު މިޞަރަޙައްދުގަ އެމްއެންޑީއެފްގެ ކޯސްޓްގާރޑުގެ ލޯންޗެއް ދަނީ ޙަރަކާތްތެރިވަމުންނެވެ.

37 އަހަރުގެ މީހަކު ގެއްލިގެން ހޯދަމުންދާއިރު، މިމަހުގެ 02 ވީ ބުރާސްފަތި ދުވަހުގެ ރޭ ބ. ދޮންފަނު ކައިރިން ޑިންގީއަކާއި ލޯންޗެއް ޖެހި ހިނގި އެކްސިޑެންޓުގައި ޑިންގީން ގެއްލުނު މީހާ އަދިވެސް ނުފެނެއެވެ.