ބްރިޖް ހައިވޭއަކީ ވެހިކަލް މަޑުކޮށްގެން އޮތުން މަނާ ސަރަހައްދެއްކަމަށާއި މި ސަރަހައްދުގައި ވެހިކަލް މަޑުކޮށްގެން އޮތުމުގެ ސަބަބުން އެކްސިޑެންޓް ހިނގަން މަގުފަހިވާކަމަށް ފުލުހުން ބުނެފިއެވެ.

މީޑިއާތަކަށް މައުލޫމާތުދެމުން ފުލުހުން މިހެން ބުނެފައިވަނީ، ހޮނިހިރު ދުވަހުގެ ހަވީރު 16:38 ހާއިރު މާލެއިން ހުޅުމާލެއަށް ދިޔަ ދެ ސައިކަލެއް ޖެހި ހިނގާފައިވާ އެކްސިޑެންޓްގެ މައުލޫމާތު ހިއްސާކުރަމުންނެވެ. ފުލުހުން ބުނެފައިވަނީ މި އެކްސިޑެންޓް ހިނގަން މެދުވެރިވީ ބްރިޖްގެ އެއްފަރާތުގައި ސައިކަލް މަޑުކޮށްފައި ނައްޓާލަން އުޅުމުގެ ތެރޭގައި ފަހަތުން އައި ސައިކަލު ޖެހިގެންކަމަށެވެ.

މި އެކްސިޑެންޓްގައި ސައިކަލްތައް ދުއްވަންތައް ތިބި 2 މީހުންނަށްވެސް އެކިވަރުގެ އަނިޔާލިބި، ހުޅުމާލެ ހޮސްޕިޓަލަށް އިތުރު ފަރުވާ ދިނުމަށް ގެންގޮސްފައިވާއިރު އެކްސިޑެންޓްވި ދެ ސައިކަލަށްވެސް ވަނީ އެކިވަރުގެ ގެއްލުންތައް ލިބިފައެވެ، އެކްސިޑެންޓްގައި ފަހަތުން އައި ސައިކަލް ދުއްވަން އިނީ 26 އަހަރުގެ ދިވެހި ފިރިހެނެއްކަމަށާއު މަޑުކޮށްގެން އިން ސައިކަލް ދުއްވަން އިނީ 30 އަހަރުގެ އަންހެނެއްކަމަށް ފުލުހުން ވަނީ މައުލޫމާތު ދީފައެވެ.

މިކަމާއި ގުޅިގެން ފުލުހުން އިތުރަށް ބުނެފައިވަނޫީ، ބްރިޖް ހައިވޭއަކީ ވެހިކަލް މަޑުކޮށްގެން އޮތުން މަނާ ސަރަހައްދެއްކަމަށާއި މި ސަރަހައްދުގައި ވެހިކަލް މަޑުކޮށްގެން އޮތުމުގެ ސަބަބުން އެކްސިޑެންޓް ހިނގަން މަގުފަހިވާކަމަށެވެ. އަދި ހުކުރު ދުވަހުވެސް މިފަދަ އެކްސިޑެންޓެއް ހިނގާފައިވާކަން ފާހަގަކޮށް ފުލުހުން ވަނީ ބްރިޖް ހައިވޭ ބޭނުންކުރާއިރު ހެދިފައިވާ ގާނޫނުތަކާއި ގަވާއިދުތަކަށް އިހްތިރާމްކުރުމަށް އިލްތިމާސްކޮށްފައެވެ.

ހޮނިހިރު ދުވަހު ހިނގައިދިޔަ މި އެކްސިޑެންޓްގައި ސައިކަލު ދުއްވި ދެ މީހުން އަތުގައިވެސް އެއްގަމު އުޅަނދު ދުއްވުމުގެ ލައިސަންސް އޮތްކަން ފާހަގަކޮށް ފުލުހުން ބުނެފައިވަނީ އެ މައްސަލަ އިތުރަށް ތަހުގީގުކުރަމުންދާކަމަށެވެ.