ފުލުސް އޮފިސަރެއްގެ ގައިގައި ސައިކަލުން ޖައްސައި ފިލަން އުޅުނު މީހަކު ހައްޔަރުކޮށްފިއެވެ.

ފުލުހުން ބުނެފައިވަނީ، ހޮނިހިރު ދުވަހުގެ ހެނދުނު 10:49 ހާއިރު ފުލުހުނ މާލެތެރެ ޕެޓްރޯލްކުރަމުން ދަނިކޮށް ޗާންދަނީ މަގު ފިހާރައެއް ކުރިމަތިން، ސައިކަލެއްގައި ގަވާއިދާއި ހިލާފަށް މުދާ އުފުލައިގެން ދިޔަ މީހެއް މަޑުކުރަން އެންގުމުން މަޑުނުކޮށް ދާން އުޅުމާއި ގުޅިގެން ފުލުހުން އެމީހާ ހުއްޓުވާފައިވާކަމަށެވެ.

ސައިކަލު ދުއްވަން އިން މީހާގެ މައުލޫމާތު ދޭން ބުނުމުން އެކަމަށް އިންކާރަކޮށް ފުލުސް މީހާއާއި ހަޑިހުތުރު ބަހުން މުއާމަލާތްކޮށް، ފުލުސް މީހާގެ ގައިގައި ސައިކަލު ޖައްސައި ފިލަން މަސައްކަތްކޮށްފައިވާކަމަށް ފުލުހުން ވަނީ ބުނެފައެވެ. މި މައްސަލައިގައި ފުލުހުންގެ ވާޖިބަށް ހުރަސްއަޅައި ފުލުހަކަށް ހަމަލާދިން މައްސަލައިގައި 34 އަހަރުގެ ދިވެހި ފިރިހެނެއް ހައްޔަރުކޮށް، ގަވާއިދާއި ހިލާފަށް މުދާ އުފުލި މައްސަލައިގައި އެމީހާގެ ލައިސަންސް ހިފަހައްޓަފައިވާކަމަށް ފުލުހުން މައުލޫމާތުދެއެވެ.

މި މައްސަލަ މޯލްޑިވިސް ޕޮލިސް ސާރވިސްއިން ދަނީ އިތުރަށް ތަހުގީގުކުރަމުންނެވެ.