އައު އަހަރުގެ ޗުއްޓީ އާއި ދިމާކޮށް އާންމުންނަށް ރައްކައުތެރިކަން ކަށަވަރަުކޮށްދިނުމަށްޓަކައި ފުލުހުން ފެށި އޮޕަރޭޝަން އަދިވެސް ކުރިޔަށްދާކަމަށް އެ އިދާރާއިން ބުނެފިއެވެ.

ހޮނިހިރު ދުވަހު ފުލުހުން ކޮށްފައިވާ ޓުވީޓެއްގައި ބުނެފައިވަނީ، "އޮޕަރޭޝަން ރިވެލި" މެދުކެނޑުމެއްނެތި ރައްޔިތުންނަށް ރައްކާތެރިކަން ކަށަވަރުކުރުމަށްޓަކައި ކުރިޔަށް ގެންދާކަމަށެވެ. ފުލުހުންގެ ޓްވީޓްގައި މިކަމާއި ގުޅޭ އިތުރު ތަފްސީލެއް ނުދެއްވައެވެ.

މިދިޔަ ޑިސެމްބަރު މަހުގެ 22 ވަނަ ދުވަހުން ފެށިގެން ފުލުހުން ރާއްޖޭގެ އެކި ކަންކޮޅުތަކުގައި ކުރިޔަށްގެންދާ މި އޮޕަރޭޝަންގައި، މާލެސިޓީން މިހާތަނަށް 6867 އުޅަނދެއް ބަލާ ފާސްކުރެވިފައިވާކަމަށާއި 908 މީހަކު ބަލާ ފާސްކޮށް ފޭރުމަށް ބޭނުން ކުރާ އާލާތްތަކާއި އަހަރު ފާހަގަކުރުމަށް ބޭނުންކުރާ އާލާތްތައް ހޯދުމަށް ފޭރިފައިވާ ފައިސާއާއި ބަނގުރަލާއި މަސްތުވާތަކެތި ބޭނުންކުރަން އާލާތްތަކާއި މަސްތުވާތަކެތި އަތުލައިގަނެފައިވާކަމަށް ފުލުހުން މީގެކުރިން ބުނެފައިވެއެވެ. އޭގެއިތުރުން، އާއަހަރާއި ގުޅިގެން ފުލުހުން ހިންގި އޮޕަރޭޝަނުގަ ޖުމުލަ 65 މީހަކު ހައްޔަރުކޮށްފައިވާ ކަމަށްވެސް ފުލުހުން ވަނީ މީގެކުރިން ބުނެފައެވެ.

ފުލުހުން ބުނީ، މި އޮޕަރޭޝަނަކީ ރަށުތެރެ ރަނގަޅަށް ބެލެހެއްޓުމަށްޓަކައި ކުރިއަށް ގެންދާ އޮޕަރޭޝަނެއް ކަމަށާއި މި އޮޕަރޭޝަނުގެ ތެރެއިން މީހުން ހުއްޓުވައި، ސުވާލުކުރުމާއި އަދި އުޅަނދުފަހަރު ހުއްޓުވައި ބަލާ ފާސްކުރުން ހިމެނޭނެ ކަމަށެވެ.

މިދުވަސް ވަރަކީ ސުކޫލްތަކުގެ ބޮޑު ޗުއްޓީ ދުވަސްވަރު ކަމަށްވާތީ، މާލޭގައި ދިރިއުޅޭ ގިނަ ބަޔަކު، ރާއްޖޭގެ އެކި ރަށްރަށާއި ރައްޖެއިން ބޭރަށް އެކިއެކި ބޭނުންތަކުގައި ދާ ދުވަސްވަރެއް ކަމަށްވާތީ އާންމުކޮށް މިދުވަސްވަރު ވައްކަމުގެ މައްސަލަތައް އިތުރުވެ އެވެ. މީގެއިތުރުން، ކޮންމެ އަހަރެއްގެ އައު އަހަރު ފާހަގަ ކުރުމަށްޓަކައި، އެކި ފަރާތްތަކުން ހިންގާ ހަރަކާތްތަކާއި ގުޅިގެންވެސް، ކުށްކުރުން މަދު ކުރުމަށް ނުވަތަ ހުއްޓުވުމަށްޓަކައި މީގެކުރިންވެސް ފުލުހުން ހާއްސަ އޮޕަރޭޝަންތައް ހިންގާފައި ވެއެވެ.