މަޝްހޫރު ދީނީ އިލްމުވެރިޔާ މުފްތީ މެންކު ރާއްޖެ ވަޑައިގެންނެވުމަށް ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން ބުނީ މުފްތީ މެންކް ރާއްޖެ ވަޑައިގަންނަވާ ގޮތައް ހަމަ ޖެހިފައިވަނީ މި ހިނގާ ޖެނުއަރީ މަހުގެ 14 އިން 18 އަށް ކަމަށެވެ. މުފްތީ ރާއްޖެ ވަޑައިގަންނަވަނީ މިނިސްޓްރީ އޮފް އިސްލާމިކް އެފެއާޒްގެ ދަޢުވަތަކަށެވެ.
މުފްތީ މެންކުގެ މި ދަތުރުފުޅުގައި މާލެއާއި އައްޑޫ ސިޓީ އަދި ކުޅުއްދުއްފުށީ ސިޓީގައި ދީނީ ދަރުސް ދިނުމަށްވަނީ ހަމަޖެހިފައިވާ ކަމަށް މިނިސްޓްރީން ބުނެފައިވެއެވެ. އަދި ޒުވާނުންނަށާއި ދީނީ ޢިލްމުވެރިންނަށް ޚާއްސަ ދީނީ ޕްރޮގްރާމްތަކެއްވެސް ކުރިއަށް ގެންދިއުމަށް ހަމަޖެހިފައިވަ ކަމަށް މިނިސްޓްރީން މައުލޫމާތު ދީފައިވެއެވެ.
މުފްތީއަކީ ޒިމްބާބުވޭގެ އިސްލާމިކް ކައުންސިލްގެ ފަތުވާ ޑިޕާޓްމެންޓުގެ އިސްވެރިއާއެވެ. އަދި ޒިމްބާބުވޭގެ ހަރާރީގެ މަސްޖިދުލް ފަލާހުގެ އިމާމުކަންވެސް ކުރައްވާ މުފްތީ ވަނީ ދުނިޔޭގެ އެކި ގައުމުތަކުގައި ދީނީ ދަރުސް ދެއްވާފައެވެ.
