ޓަގު ބޯޓެއްގެ ފަޅުވެރިއަކަށްވެގެން ފިއްލަވައިގެން އިންޑިއާ އަށް ވަޑައިގެންނެވި މައްސަލާގައި ކުރީގެ ނައިބް ރައީސް އަހުމަދު އަދީބު ތިން މަހާއި 18 ދުވަހަށް ޖަލަށްލާން ކުރި ހުކުމގެ މުއްދަތު ހަމަވިޔަސް، މިނަވަން ނުވާނެކަމަށް ވަކީލުން ވިދާޅުވެއްޖެ އެވެ.

އަދީބުގެ ވަކީލް މަހްފޫޒް ސައީދު ވިދާޅުވީ، ތިން މަހާއި 18 ދުވަހުގެ ޖަލު ހުކުމް ހުކުރު ދުވަހުގެރޭ 12:00 އަށް ތަންފީޒުކޮށް ނިމޭނެކަމަށާއި، ހުކުމް ތަންފީޒުކޮށް ނިމޭ ދުވަހުން ފެށިގެން، އަދީބުގެ ޝަރީއަތް ނިމެންދެން ބަންދުގައި ބަހައްޓަން ޑިސެމްބަރު މަހު ކްރިމިނަލް ކޯޓުން އަމުރު ކޮށްފައިވާކަމަށެވެ. އެގޮތަށް އަމުރުކުރީ ފަހުން އަދީބުގެ މައްޗަށް ކުރި ޚިޔާނާތުގެ ދައުވާތަކާ ގުޅިގެންނެވެ. ދައުލަތުންކުރި، ގާނޫނު ހިންގުމަށް ހުރަސް އެޅުމުގެ ދައުވާ ސާބިތުވެ ތިން މަހާއި 18 ދުވަހު ޖަލަށްލާންހުކުމްކުރި ފަހުންވެސް ދައުލަތުން ވަނީ ހިޔާނާތުގެ އިތުރު ދައުވާތަކެއް ވެސް އަދީބުގެ މައްޗަށް އުފުލައިފައެވެ.

ޅ. މާބިންހުރާ ކުއްޔަށްދީގެން ދައުލަތަށް ލިބެންޖެހޭ ފައިސާއަށް ޚިޔާނާތްތެރިވި މައްސަލަ އަދީބުގެ މައްޗަށް ސާބިތުނުވާކަމަށް ހުކުމްކުރުމާއި ގުޅިގެން ދައުލަތުން އެ މައްސަލަ ސުޕްރީމް ކޯޓުގައި އިސްތިއުނާފްކޮށް އެ މައްސަލާގައި އަދީބު މުޖުތަމައަށް ދޫވެފައި ހުރެއްޖެނަމަ މުޖުތަމައަށް ނުރައްކާ ވެދާނެތީ އާއި ފިއްލަވާފާނެތީ އަދި އެކަން ކަށަވަރުވެފައިވާތީ ޝަރީއަތް ނިމެންދެން އަދީބު ހައްޔަރުކޮށްފައި ބެހެއްޓުމަށް ދައުލަތުން އެދުމުން ސުޕްރީމް ކޯޓުން ވަނީ ޝަރީއަތް ނިމެންދެން އަދީބު ބަންދުގައި ބެހެއްޓުމަށް އަމުރުނެރިފައިވެއެވެ.

ޑޮކްޓަރުންގެ ލަފާގެ މަތިން ބަލި ހާލަތަށް ބެލުމަށްފަހު ޖަލު ބަންދުގައި ހުންނެވުމަށްފަހު އަދީބު ގެއަށް ބަދަލު ކޮށްފައިވަނިކޮށް ވަރގޯ 9 ކިޔާ ޓަގް ބޯޓެއްގައި އިންޑިއާގެ ޓުޓްކޮރިން ބަނދަރުން އެ ގައުމަށް އެތެރެވާން އުޅެނިކޮށް އަދީބު ހައްޔަރުކޮށްފައިވަނީ މިދިޔަ އަހަރުގެ އޮގަސްޓު މަހުގެ 1 ވަނަ ދުވަހުއެވެ.

ގާނޫނު ހިންގުމަށް ހުރަސް އެޅުމުގެ ދައުވާގައި ދައުލަތުން ބުނެފައިވަނީ ޕާސްޕޯޓް ހިފަހައްޓާފައި ވަނިކޮށް ކަނޑުމަގު އިންޑިއާ އަށް ވަޑައިގަންނަވަން އުޅުއްވަނިކޮށް ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، އެކަމަށް ޖިނާއީ އިޖުރާއަތުގެ ގާނޫނުގައި ކަނޑައެޅިފައިވާ އަދަބަކީ ޖުނުހުގެ އެއްވަނަ ދަރަޖައިގެ ކުށެއް ކަމަށެވެ. އެކަމާއި ގުޅިގެން އަދީބް ވިދާޅުވީ، ފިއްލަވަން ޖެހިވަޑައިގަތީ ފުރާނައަށް ނުރައްކާތެރިވުމުން ބޭރު ގައުމަކުން ސިޔާސީ ހިމާޔަތް ހޯއްދަވަމުން ކަމަށެެވެ. އަދި އެފަދަ ކަމެއް އިތުރަށް ތަކުރާރު ނުވާނެ ކަމަށް އަދީބް ވަނީ ވިދާޅުވެފައެވެ.

ސިންގަޕޫރުގައި ރެޖިސްޓަރީ ކޮށްފައިވާ ވަރގޯ 9 ކިޔާ ޓަގް ބޯޓެއްގައި އިންޑިއާގެ ޓުޓްކޮރިން ބަނދަރުން އެ ގައުމަށް އެތެރެވާން އުޅެނިކޮށް އަދީބު ހައްޔަރު ކޮށްފައިވަނީ މިދިޔަ އަހަރުގެ އޮގަސްޓު މަހުގެ 1 ވަނަ ދުވަހުއެވެ. ދުވަހު ކްރިމިނަލް ކޯޓުން އިއްވީ ތިން މަހާއި 18 މަސް ދުވަހުގެ ޖަލު ހުކުމެކެވެ. 24 އޮކްޓޯބަރުގައި ވަނީ އަދީބް ފިއްލަވަން މަސައްކަތް ކުރެއްވި ޓަގް ބޯޓުގެ ކެޕްޓަނަށާއި އިންޖިނިއަރަށް ޖަލު ހުކުމެއް އިއްވައިފައެވެ. އިންޑޮނޭޝިއާއަށް ނިސްބަތްވާ އެ ދެ ފަޅުވެރިން ވަނީ ކުށަށް އިއުތިރާފުވެފައެވެ.