ރާއްޖެ އަންނަ ފަތުރުވެރިންގެ ތެރެއިން މާލެއަށް ޒިޔާރަތްކުރާ ފަތުރުވެރިންނަށް ޚާއްޞަކޮށްގެން މަސްވެރިންގެ ޕާކުގައި ތަރައްޤީކުރި ރެސްޓްރޫމްގެ ހިދުމަތް އައު އަހަރުގެ ބަންދަށް ފަހު ސަރުކާރު ހުޅުވުމުން ރަސްމީގޮތެއްގައި ހިދުމަތް ދޭންފަށާނެކަމަށް މާލެ ސިޓީ ކައުންސިލުން ބުނެފިއެވެ.

ރާއްޖެއެމްވީއަށް މައުލޫމާތުދެއްވަމުން މާލެސިޓީ ކައުންސިލްގެ ޑެޕިއުޓީ މޭޔަރު ޝަމާއު ޝަރީފް ވިދާޅުވީ، މިހާރުވެސް ފަތުރުވެރިންނަށް އެ ސެންޓަރުން ހިދުމަތް ދެމުން އަންނަކަމަށާއި މުވައްޒަފުން ދަަނީ ހިދުމަތް ހޯދުމަށް އަންނަ ފަތުރުވެރިންނަށް މައުލޫމާތު ފޯރުކޮށްދެމުންކަމަށެވެ. ޝަމާއު ވިދާޅުވީ ގެސްޓް ރިލޭޝަންސް ސެންޓަރުގެ ފުރިހަމަ ހިދުމަތް ލިބޭނީ އައު އަހަރުގެ ބަންދަށްފަހު ސަރުކާރު ރަސްމީކޮށް ހުޅުވޭ ދުވަހު ކަމަށާއި އެއާއެކު ފަތުރުވެރިން ދަތުރުކުރާ ފެރީވެސް ކައިރި ކުރާނީ އެ ސަރަހައްދަށްކަމަށެވެ.

މިކަމާއި ގުޅިގެން ރާއްޖެއެމްވީއަށް މައުލޫމާތުދެއްވަމުން މާލެ ސިޓީގެ މޭޔަރ ޝިފާ މުހައްމަދު ވިދާޅުވީ، ޖެނުއަރީ 1 އިން 4 ގެ ނިޔަލަށް އެއީ ސަރުކާރު ބަންދު ދުވަސްކަމަށްވާތީ، ގެސްޓް ރިލޭޝަންސް ސެންޓަރުގައި ހިދްމަތް ދޭން ޝައުގުވެރިކަން ފާޅުކުރާ ފަރާތްތަކާއި މަޝްވަރާކުރަމުންދާކަމަށެވެ.

މީޑިއާއަށް މަޢުލޫމާތު ދެއްވަމުން މާލެ ސިޓީ ކައުންސިލުގެ މޭޔަރ ޝިފާ މީގެކުރިން ވިދާޅުވީ މިތަން ވެގެންދާނީ ފަތުރުވެރިން ލަފާ ފުރުމުގައި ވަރަށް މުހިންމު ތަނަކަށް ކަމަށާއި އެތަނުން ފަތުރުވެރިންނަށް ބޭނުންވާ މަޢުލޫމާތާއި މާލޭގައި ހުރި އާޘާރީ ތަންތަނާއި ކައިރި ރަށްރަށް ދަތުރުކުރާ ފެރީގެ މަޢުލޫމާތުގެ އިތުރުން މާލެއިން ދެވެން ހުންނަ ރަށްރަށުގެ މަޢުލޫމާތު އެތަނުން ލިބޭނެ ގޮތަށް ހަމަޖެހިގެންދާނެ ކަމަށެވެ.

މިއީ ފަތުރުވެރިންނަށް ޚާއްޞަކޮށްގެން މާލޭގައި ފުރަތަމަ ފަހަރަށް ހެދި ފާޚާނާ ބަރިއެވެ. 7 ފާޚާނާއާއި ޚާއްޞަ އެހީއަށް ބޭނުންވާ މީހުން ފެންވެރުމާއި ފާޚާނާ ކުރުމަށް ހަދާފާއިވާ ފާޚާނާއަކާއި 2 ފެންވަރާ ތަނާއި އަދި މޫނު ދޮވެ ރީތިވުމަށް ބޭނުންކުރެވޭނެގޮތަށް ހަދާފައިވާ ރެސްޓް ރޫމް ބައިގައި ކުޑަ އޮފީހަކާއި ވެއިޓިންގ އޭރިއާއެއް ހިމެނޭ ގޮތަށް ތަރައްޤީ ކުރި މިތަން ހިންގަން ނިންމާފައިވަނީ ބިޒްނަސް މޮޑެލްއަކަށް ކަމަށް ސިޓީ ކައުންސިލުން މަޢުލޫމާތުދެއެވެ.