ކުރީގެ ރައީސް އަބްދުﷲ ޔާމީންގެ ބޭންކު އެކައުންޓުގައި ހުރި ފައިސާ ދައުލަތަށް ނެގުމުގެ އަމުރަކަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ކްރިމިނަލް ކޯޓުން އެދިފައިވާ މައްސަލަ އެކޯޓުން ބަލައިގަތްކަން ނުވަތަ ނޫންކަންވެސް މިހާތަނަށް ޕީޖީ އޮފީހަށް އަންގާފައިނުވާކަމަށް އެ އޮފީހުން ބުނެފި އެވެ.

ރައީސް ޔާމީންގެ ބޭންކު އެކައުންޓުގައި ހުރި ފައިސާ ދައުލަތަށް ނެގުމުގެ އަމުރަކަށް އެދިފައިވާ މައްސަލަ ކްރިމިނަލް ކޯޓުން ބަލައިގަނެފައިވާ ކަމަށް، ޕީޖީ އޮފީހުގެ އޮފޮޝަލަކާ ހަވާލާދީ، ބައެއް މީޑިއާތަކުގައި ހަބަރު ފެތުރިފައިވާތީ، "ރާއްޖެއެމްވީ" ޕީޖީ އޮފީހުގެ މީޑިއާ އޮފިޝަލަށް ގުޅާލުމުން ވިދާޅުވީ، "ރައީސް ޔާމީންގެ މައްސަލަ ބަލައިގަތްކަން ނުވަތަ ނޫން ކަންވެސް ކްރިމިނަލް ކޯޓުން މި އޮފީހަށް އަންގާފައެއް ނުވޭ،" ކަމަށެވެ.

މިކަމާގުޅޭގޮތުން، ކްރިމިނަލް ކޯޓުގެ ބަހެއް އަދިވަނީ ލިބޭގޮތް ނުވެފަ އެވެ.

ޑިސެމްބަރު މަހުގެ 26 ވަނަ ދުވަހު ޕީޖީ އޮފީހުން ކުރި ޓްވީޓެއްގައި ބުނެފައިވަނީ، އަބްދުﷲ ޔާމީނުގެ މައްޗަށް މަނީ ލޯންޑްރިންގގެ ކުށް ސާބިތުވާކަމަށް ކަނޑައަޅުއްވާފައިވާތީ، ޖިނާއީ އިޖުރާއަތުގެ ޤާނޫނުގެ 192 ވަނަ މާއްދާއާއި، މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ 62 ވަނަ މާއްދާގެ ދަށުން އެމަނިކުފާނުގެ އެކައުންޓުގައި ހުރި މައްސަލައާގުޅޭ ފައިސާ ދައުލަތަށް ނެގުމުގެ އަމުރަކަށް އެދިި ކުރިމިނަލް ކޯޓަށް ހުށައަޅާފައިވާ ކަމަށެވެ.

މަނީލޯންޑަރ ކުރުމުގެ ކުށް ސާބިތުގެ، ރައީސް ޔާމީން 5 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ހުކުމް ކުރީ ނޮވެމްބަރު މަހުގެ 28 ވަނަ ދުވަހު އެވެ. އެނގިފައިވާ ގޮތުގައި، އެހުކުމާ ގުޅިގެން ޕީޖީ އޮފީހުން ކްރިމިނަލް ކޯޓަށް ހުށައަޅުއްވާފައިވަނީ ރައީސް ޔާމީންގެ އެކައުންޓްގައި ހުރި 3.4 މިލިއަނަށްވުރެ ގިނަ ޑޮލަރު ދައުލަތައް ނެގުމުގެ އަމުރެއް ނެރެދެއްވުމަށެވެ.

އެ ޢަދަދަކީ ރައީސް ޔާމީން މަނީލޯންޑަރކުރި ފައިސާއާއި އެފައިސާ އިންވެސްޓްމަންޓް އެކައުންޓަށް ޖަމާކޮށް އިންވެސްޓްކުރުމުން ފައިދާގެ ގޮތުގައި ލިބުނު ފައިސާ ކަމަށް ބަލާ ނަގާދޭން އެދިފައިވާ އަދަދުކަމަށްވެއެވެ.

މަނީ ލޯންޑަރ ކުރުމުގެ ކުށް ސާބިތުވެ، ރައީސް ޔާމީން 5 އަހަރަށް ޖަލަށްލުމާއި 5 މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ކުރި ހުކުމް އެމަނިކުފާނުގެ ފަރާތުން ވަނީ ހައިކޯޓުގައި އިސްތިއުނާފް ކޮށްފަ އެވެ. އަދި ހައިކޯޓުން ވަނީ އެމައްސަލަ ބަލައިގަނެފަ އެވެ.

ރައީސް ޔާމީނުގެ މައްޗަށް ކްރިމިނަލް ކޯޓުން އިއްވި ހުކުމުގައި ބުނެފައިވަނީ ދައުލަތުގެ ހުށަހެޅި ހެކިތަކާއި، ހެކިވެރިން ހެކިބަހުން ޔާމީނުގެ މައްޗަށް އުފުލާފައިވާ ދައުވާ ސާބިތުވެފައިވާކަމަށެވެ. މައްސަލަ ބަލާ ފަސް ގާޒީން ދިރާސާކޮށް ބަހުސްކޮށް 5 ގާޒީންނަށް އިއްތިފާގުވެވިފައިވަނީ 8 ކަމަކަށް ރިއާޔަތްކޮށް ކުށް ސާބިތުވާކަމަށެވެ.

ރައީސް ޔާމީނުގެ މައްޗަށް ކޮށްފައިވާ ހުކުމުގައި ވަނީ އެމަނިކުފާނުގެ މައްޗަށް ދައުވާކޮށްފައިވާ ކުށުގެ އަމަލުގެ ހުރިހާ އުންސުރެއް ފުރިހަމަވާ ކަމަށެވެ. އަދި ޕާޓީއަށް ލިބެންޖެހޭ ފައިސާ ޖަމާކުރަން ޖެހޭނީ ޕާޓީގެ އެކައުންޓަށްކަން ސިޔާސީ ޕާޓީތަކުގެ ޤާނޫނުން އެގޭކަމަށް ގާޒީ އަލީ ރަޝީދު ވިދާޅުވިއެވެ. މި ނުކުތާ ޝަރީއަތުން ފާހަގަ ކުރަންޖެހުނީ، ޝަރީއަތުގެ މަޖިލީހުގައި ރައީސް ޔާމީން ވިދާޅުވި ވިދާޅުވުމަކާ ގުޅިގެންނެވެ. ރައީސް ޔާމީން ވިދާޅުވެފައިވަނީ މަނީ ލޯންޑަރ ކުރުމުގެ މިދައުވާގައި ބުނާ، އެއް މިލިއަން ޑޮލަރަކީ ޕީޕީއެމްގެ ކެމްޕެއިން ހަރަކާތްތަކަށް އެހީވާ ފަރާތަކުން ދީފައިވާ ފައިސާކަމަށެވެ.