ކުރީގެ ރައީސް މައުމޫން އަބްދުލްގައްޔޫމް ހޮސްޕިޓަލްގައި އެޑްމިޓް ކުރެއްވީ ޓެސްޓްތަކެއް ހަދަން ކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް)ގެ ސެކެޓަރީ ޖެނެރަލް އަބްދުލް އަލީމް އާދަމް ވިދާޅުވެއްޖެ އެވެ.

ރައީސް މައުމޫން އިސްކޮށް ހުންނަވާ ދާދިފަހުން އެފެއްދެވި، އެމްއާރުއެމްގެ ސެކެޓަރީ ޖެނެރަލް އަލީމް ވިދާޅުވީ، ރައީސް މައުމޫން ހޮސްޕިޓަލުގައި އެޑްމިޓް ކުރައްވާފައިވަނީ، ރޯގާ ޖެހިގެން އާލާސްކަންފުޅާ އުޅުއްވާތީ ކަމަށެވެ. އަދި ރޯގާ ދިގުލާތީ، ޓެސްޓްތަކެއް ހެދުމަށް ރައީސް މައުމޫން ވަނީ އެޑްމިޓް ކުރެވިފައި ކަމަށް އަލީމް ވިދާޅުވި އެވެ.

އެނގިފައިވާ ގޮތުގައި، ރައީސް މައުމޫން އެޑްމިޓް ކުރައްވާފައިވަނީ ހޯމަ ދުވަހުގެ ފަތިހުގެ ވަގުތެއްގައި އައިޖީއެމްއެޗްގަ އެވެ. ރައީސް މައުމޫން ހޮސްޕިޓަލްގައި އެޑްމިޓް ކޮށްފައި މިވަނީ އެމަނިކުފާނުގެ 82 ވަނަ އުފަންދުވަސް މިމަހުގެ 29 ވަނަ ދުވަހު ފާހަގަކޮށްފައި ވަނިކޮށެވެ.

ރައީސް މައުމޫން އާލާސްކަންފުޅާ އުޅުއްވާތީ ދޭތެރެދޭތެރެއިން ރާއްޖެއިން ބޭރަށް ވަޑައިގެން އަބަދުވެސް ފަރުވާ ހޯއްދަވަމުން ގެންދަވަ އެެވެ. އަދި އެމަނިކުފާނަކީ އަބަދުވެސް ސިއްހަތަށް ވަރަށް ބޮޑަށް އިސްކަން ދެއްވައިގެން ދިރިއުޅުމުގެ ރަނގަޅު އާދަތައް ހިފަހައްޓަވާ ބޭފުޅެއް ކަމަށް ވެއެވެ.

ރައީސް މައުމޫނަކީ ރާއްޖޭގެ ވެރިކަން 30 އަހަރު ކުރެއްވި، އަދި ރާއްޖެ ޑިމޮކްރަސީގެ މަގަށް ދީލާލުމުގައި އިސް ދައުރެއް އަދާކުރެއްވި ބޭފުޅެކެވެ. މިހާރު އަމަލު ކުރަމުންދާ އާ ގާނޫނުއަސާސީއާއި ސިޔާސީ ޕާޓީތައް އުފެދިފައިވަނީ އެމަނިކުފާނުގެ ވެރިކަމުގެ ފަހު ދައުރުގަ އެވެ.

އެމްއާރުއެމްއަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުގެ ކޯލިޝަނުގައި ހިމެނޭ ޕާޓީ އެކެވެ.