އަންނަ އަހަރުގެ ފަތުރުވެރިކަމުގެ ދުވަސް ފާހަގަކުރުމުގެ ގޮތުން ކުރިއަށް ގެންދިއުމަށް ރޭވިފައިވާ ޙަރަކާތްތަކުގެ ތެރޭގައި ދުނިޔޭގެ ސްކޫބާ ޑައިވް ރެކޯޑު މުގުރާލުމަށް ޙަރަކާތެއް ބޭއްވުމަށް ޤަޞްދުކޮށްފައިވާ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އަލީ ވަހީދު ވިދާޅުވީ އަންނަ އަހަރުގެ ކުރީ ކޮޅުގައި ފަތުރުވެރިކަމުގެ ދުވަސް ފާހަގަކުރުމަށް ރޭވިފައިވާ ކަންކަން އިޢުލާނު ކުރައްވާނެ ކަމަށެވެ. އެގޮތުން ޖެނުއަރީ މަހުގެ 20 ވަނަ ދުވަހު ބާއްވާ ޙަފުލާއެއްގައި އެދުވަހާއި ގުޅިގެން ބޭއްވޭ ޙަރަކާތްތަކާއި ގުޅިގެން މަޢުލޫމާތު ދެއްވާނެ ކަމަށެވެ.
މިއަހަރުވެސް ގިނަ ޙަރަކާތްތަކެއް ހިންގުނުކަން ފާހަގަކުރައްވާ މިނިސްޓަރ ވިދާޅުވީ ޢާންމުންގެ ވަރަށް ބޮޑު ތަރުހީބެއް އެޙަރަކާތްތަކަށް ލިބިގެން ދިޔަ ކަމަށެވެ.
މިއަހަރުވެސް ބޭއްވިގޮތަށް ދިވެހިންގެ ސަގާފަތާއި އާދަކާދަތައް ހިމެނޭ އިވެންޓެއް ރާއްޖޭގެ ރަށެއްގައި ބޭއްވި. މިފަހަރު ބޭއްވީ ވ. އަތޮޅުގައި. ދެން ބާއްވާނީ ކޮންމެވެސް އެހެން އަތޮޅެއްގައި، އެހެން ރަށެއްގައި. އަދި އަޅުގަނޑުމެން މަސައްކަތް ކުރަމުން މިގެންދަނީ އަންނަ އަހަރުގެ އެންމެ ޚާއްސަކަމެއްގެ ގޮތުގައި ދުނިޔޭގެ ފަތުރުވެރިކަމުގެ ދުވަސްކަމަށްވާ ސެޕްޓެމްބަރު 27 ވަނަ ދުވަހު ރާއްޖޭގެ ރަށެއް ކަނޑުއަޑިން ވަށާ ލަން. ހިއުމަން ރިންގަކުން. އެއީ ސްކޫބާ ޑައިވް ވަރލްޑް ރެކޯޑެއް. މިހާރު ގާއިގަނޑަކަށް 500 އެއްހާ މީހުންގެ ރެކޯޑެއް އޮތީ. އަޅުގަނޑުމެން މަސައްކަތް ކުރަމުންގެންދަނީ މި ޖެނުއަރީގައި އިއުލާނު ކުރުމަށްފަހު ދުނިޔޭގައި މިކަން އިސްތިހާރު ކުރުމަށްފަހު ސެޕްޓެމްބަރު 27 ވަނަ ދުވަހު މުޅި ދުނިޔޭގައި ފަތުރުވެރިކަމުގެ ދުވަސް ފާހަކަކުރަމުންދާއިރު ރާއްޖޭގައި ރެކޯޑު މުގުރާލުން.ޓުއަރިޒަމް މިނިސްޓަރ އަލީ ވަހީދު
މީގެ އިތުރުން މިނިސްޓަރ ވިދާޅުވީ ހުވަދު އަތޮޅު ފަދަ މަސްވެރިއަތޮޅުތަކުގައި 'ފިޝިން ޓުއަރިޒަމް' ނުވަތަ މަސްވެރިކަމާއި ފަތުރުވެރިކަމާއި ގުޅުވައިގެން ޙަރަކާތްތަކެއް ފަތުރުވެރިކަމުގެ ދުވަހާއި ގުޅިގެން ކުރިއަށް ގެންދިއުމުގެ ވިސްނުން ގެންގުޅުއްވާ ކަމަށެވެ. އަދި ފަތުރުވެރިކަމުގެ ސިނާޢަތުގައި މަސައްކަތްކުރާ ދިވެހި އަންހެނުންގެ ޢަދަދު އިތުރުކުރުމަށް ޙަރަކާތްތަކެއް ރޭވިފައިވާ ކަން ވެސް ފާހަގަކުރެއްވިއެވެ.
މިނިސްޓަރ ވިދާޅުވީ ދުނިޔޭގެ ކުރީގެ މަޝްހޫރު މޮޅު ކުޅުންތެރިންގެ ތެރެއިން 3 ކުޅުންތެރިންނާއި އެކު ޙަރަކާތްތަކެއް ރާއްޖެ އިޝްތިހާރު ކުރުމުގެ ބޭނުމުގައި ބޭއްވޭނެ ކަމަށެވެ. މިނިސްޓަރ ވިދާޅުވީ ލަންޑަންގެ އޫޓުއެރީނާ އަދި ދުބާއީ ފަދަ ތަންތަނުގައި ވެސް އެފަދަ ޙަރަކާތްތައް ކުރިއަށް ގެންދަވާނެމަށެވެ. މިނިސްޓަރ ވިދާޅުވީ ސެޕްޓެންބަރު 27 ން އޮކްޓޯބަރު 3 އަކާއި ދޭތެރޭގައި މި ޙަރަކާތްތައް ގެންދެވޭނެ ކަމަށެވެ. ގާލާ ނައިޓް މިއަހަރެކޭ އެއްފަދައިން އަންނަ އަހަރުވެސް ބޭއްވުމަށް ހަމަޖެހިފައިވަނީ އޮކްޓޯބަރު މަހު 3 ގައެވެ.
