ސީރިއާގައި ޙާލުގައި ޖެހިފައި ތިބި ދިވެހިން ސަލާމަތްކޮށް އަނބުރާ ރާއްޖެ ގެނައުމަށް ކުރާ މަސައްކަތުގައި ދިވެހި ފުލުހުން ސީރިއާގައި ޙަރަކާތްތެރިވަމުން އަންނަކަމަށް ބުނާ ވާހަކަތައް ފުލުހުން ދޮގުކޮށްފި އެވެ.
ފުލުހުން ބުނީ، ފުލުހުންގެ ޓީމެއް އެއްވެސް އިރެއްގައި ސީރިއާގައި ޙަރަކާތްތެރިވެފައި ނުވާ ކަމަށާއި އަދި މިހާރު ވެސް ސީރިއާގައި ޙަރަކާތްތެރިވަމުންނުދާ ކަމަށެވެ. ނަމަވެސް އެ ޤައުމުގައި ތާށިވެފައި ތިބި ބައެއް ދިވެހިން ރާއްޖެ ގެންނަން ސަރުކާރުން ނިންމާފައިވާތީ ކަމާ ބެހޭ ވުޒާރަތަކާ ގުޅިގެން ބަލަން ޖެހޭ ކަންކަން ފުލުހުން ބަލަމުންދާ ކަމަށް ފުލުހުން ބުނެއެވެ.
ބައެއް މީޑިއާތަކުން ރިޕޯޓުކޮށްފައިވާ ގޮތުގައި ސީރިއާއަށް ގޮސް އުޅޭ ދިވެހިން ރާއްޖެ އަންނަން ބޭނުންވޭތޯ ބަލަން ދިވެހި ފުލުހުން ހިމެނޭ ގޮތަށް ސަލާމަތީ ބާރުތަކުގެ ޓީމެއް ސީރިއާގައި ޙަރަކާތްތެރިވަމުން އެބަދެއެވެ.
މިދިއަ ސެޕްޓެންބަރު މަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެފައިވަނީ، ސީރިއާގައި ޙާލުގައި ޖެހިފައި ތިބި އަންހެނުންނާއި ކުޑަކުދިން އެހެން ޤައުމަކަށް ގެންދިޔުމަށް ފަހު އަނބުރާ ރާއްޖެ ގެނައުމުގެ މަސައްކަތް ކުރަމުން އަންނަ ކަމަށެވެ. އެހެން ނަމަވެސް، އެ މީހުން އަނބުރާ ރާއްޖެ ގެނެސް މުޖުތަމަޢަށް ނެރުމުގެ ކުރިން އެ މީހުން ރިހިބިލިޓޭޓް ކުރާނެ ކަމަށް ރައީސް ވިދާޅުވި އެވެ.
ހަނގުރާމަތަކަށް ގޮސްފައި އަންނަ މީހުން ރިހިބިލިޓޭޓް ކުރާ ސެންޓަރު، ޑީ-ރެޑިކަލައިޒޭޝަން އެންޑް ރީހެބިލިޓޭޝަން ސެންޓަރު، ކ. ހިންމަފުށީގައި ޤާއިމުކުރުމުގެ މަސައްކަތް ސަރުކާރުން ވަނީ މިހާރު ފަށާފައެވެ.
