ރަހުމު ކުޑަގޮތަކަށް ހުޅުމާލޭގައި މަރާލާފައި އޮއްވާ ފެނުނު ޓެކްސީ ޑްރައިވަރު ޤާސިމް ހަސަންގެ މަރާއި ގުޅިގެން ހައްޔަރުކުރި މީހާ އިޢުތިރާފްވި ނަމަވެސް، ހެއްކާއި ޤަރީނާ ހުރުން މުހިއްމު ކަމަށް ޕްރޮސެކިއުޓަރ ޖެނެރަލް ޙުސައިން ޝަމީމު ވިދާޅުވެއްޖެއެވެ.
މިހެން ޕީޖީ ވިދާޅުވީ ހުކުރުދުވަހުގެ ރޭ ކުރެއްވި ޓްވީޓެއްގައެވެ.
ޕީޖީ ޓްވީޓު ކުރެއްވީ ގާސިމްގެ މަރާއި ގުޅިގެން ހައްޔަރުކުރި މީހާ އެކަމަށް އިޢުތިރާފުވެއްޖެ ކަމަށް ހާމަކޮށް ކޮމިޝަނަރ އޮފް ޕޮލިސް މުޙައްމަދު ހަމީދު ކުރެއްވި ޓްވީޓަށް ރިޕްލައިކޮށް މީހަކު، މި ފަދަ ކޯޓު ކޭސްތައް އަވަސް މުއްދަތެއްގައި ކުރިއަށް ގެންދަން ނުޖެހޭތޯ ޕީޖީ އާއި ސުވާލު ކުރުމާއި ގުޅިގެން، އެ ސުވާލަށް ޖަވާބުދެއްވަމުންނެވެ.
ޕީޖީ ޝަމީމް ކުރެއްވި ޓްވީޓެއްގައި ވަނީ ގާސިމުގެ މަރާއި ގުޅިގެން ހައްޔަރު ކުރި މީހާ އެކަމަށް އިޢުތިރާފުވި ނަމަވެސް، އަނބުރާ ނަގަން ނިންމައިފިނަމަ ބަރޯސާވާން ޖެހޭނީ ހެއްކާއި ޤަރީނާއަށް ކަމަށެވެ. ޕީޖީ ވިދާޅުވީ ހުރިހާ ހެއްކާއި ޤަރީނާއެއް ހޯދުން މުހިއްމު ކަމަށާއި އަދި އެއީ 'ބެސްޓް ޕްރެކްޓިސް' ކަމަށެވެ. ޝަމީމުގެ ޓްވީޓުގައި ވަނީ ޕީޖީ އޮފީހުން ގާސިމުގެ މަރު ތަހުޤީޤިކުރުމަށް ފުލުހުންނާއި ވަރަށް ގާތުން މަސައްކަތް ކުރަމުންދާ ކަމަށް ވިދާޅުވެފައެވެ.
ޑްރައިވަރު ގާސިމް މަރާލާފައިވަނީ، ޑިސެންބަރު މަހުގެ ހަތަރުވަނަ ދުވަހުގެ ރޭގަނޑުގެ ވަގުތެއްގައެވެ. އޭނާ މަރުވެފައި އޮއްވާ ފެނުނީ، ހުޅުމާލެއިންނެވެ.
މި މައްސަލައިގައި މީހަކު ހައްޔަރުކޮށްފައިވަނީ ބުރާސްފަތި ދުވަހުއެވެ. އަދި މި މައްސަލައިގައި ބޭނުންކުރި ހަތިޔާރު ފުލުހުން ހޯދާފައިވާއިރު، އޭތި ފެނިފައިވަނީ ގާސިމް މަރާލި ޞަރަޙައްދު ކައިރިން ކަމަށްވެސް ފުލުހުން މަޢުލޫމާތު ދީފައިވެއެވެ.
