އައްޑޫ ސިޓީއަށް ގެއްލިގެން ދިޔަ ހަތްއަހަރު ދުވަހަކީ ފޫނުބެއްދޭވަރުގެ ބޮޑު ގެއްލުމެއް ކަމަށް އައްޑޫ ސިޓީގެ މޭޔަރު އަބްދުﷲ ސޯދިގު (ސޯބެ) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މޭޔަރު ސޯދިގު ވިދާޅުވީ މިފާއިތުވެގެންދިޔަ ހަތް އަހަރު ދުވަހުގެ ތެރޭގައި އައްޑޫ ސިޓީގެ ތަރައްގީގެ މަޝްރޫއުތައް ކުރިއަށް ގެންދިޔަނަމަ، މިހާރު އެސިޓީއަކީ އެންމެ ތަރައްގީވެފައި އޮންނާނެ އެއްސިޓީ ކަމަށެވެ. ނަމަވެސް މަޝްރޫއުތައް ކުރިއަށް ނުގެންދެވި ކައުންސިލް ހިންގުމަށް މިފާއިތުވެދިޔަ ސަރުކާރުތަކުން ހުރަސް އެޅުމުގެ ނަތީޖާގެ ދެރަ ލިބުނީ ރައްޔިތުންނަށް އޭނާ ވިދާޅުވިއެވެ.
މޭޔަރު ސޯދިގު ވިދާޅުވީ މިހާރު ހިންގުމަށް ހަމަޖެހިފައިވާ މަޝްރޫއުތަކާއި، ހިންގަމުންދާ މަޝްރޫއުތަކަކީ ހަގީގަތުގައި މިފާއިތުވެގެންދިޔަ ހަތް އަހަރުގެ ތެރޭގައި ނިމިފައި ހުންނަންޖެހޭ މަޝްރޫއުތައް ކަމަށެވެ.
ޓޫރިޒަމްގެ ސިނާއަތަށް އަލިއަޅުއްވާލައްވާ މޭޔަރު ސޯދިގު ވިދާޅުވީ ކުރީގެ ރައީސް މުހައްމަދު ނަޝީދުގެ ވެރިކަމުގައި ކޮންވެންޝަން ސެންޓަރު ހުރި ސަރަހައްދުގައި 100 އެނދުގެ ހޮޓެލްއެއް ގާއިމް ކުރުމުގެ މަސައްކަތް ކުރެވުނު ކަމަށެވެ. ނަމަވެސް އެމަނިކުފާނު ވެރިކަން ވައްޓާލުމާ ގުޅިގެން އެމަސައްކަތް ކުރިއަށް ނުގެންދެވި މަޑުޖެހިގެން ދިޔައީ ކަމަށް މޭޔަރު ވިދާޅުވިއެވެ.
މީގެ އިތުރުން މޭޔަރު ވިދާޅުވީ އެސަރަހައްދުން ބިން ހިއްކުމަށް ނިންމާފައިވާ ކަމަށާއި، ނަމަވެސް އެމަސައްކަތް ވެސް ކުރިއަށް ނުގެންދެވޭ ކަމަށެވެ. އަދި ރައްޔިތުންގެ އާންމު ދިރިއުޅުމަށް ވެސް އެކަމުގެ ނޭދެވޭ އަސަރުތައްކޮށް، ބޯހިޔާވަހިކަމުގެ ދަތިތަކުގެ މައްސަލައަށް ބޮޑު ދަތިތަކެއް ކުރިމަތިވި ކަމަށެވެ.
އޭރު ކޮންވެންޝަން ސެންޓަރު ކައިރީގަ 100 އެނދުގެ ހޮޓެލް ގާއިމްކޮށްފައި ފަތުރުވެރިކަމުގެ ކޮންވެޝަން ޓޫރިޒަމްއަށް އެތަން ހުޅުވާލަން އޮތީ މަސައްކަތް ރޭވިފައި. އިއުލާން ވެސް ކުރެވުނު. އެއިއުލާނަށް ކުރިމަތިލާ ބިޑް ހުޅުވަން އޮތީ ފެބްރުއަރީ 14 ވަނަ ދުވަހު. ވެރިކަން ބަދަލުވެގެން ދިޔައީ ފެބްރުއަރީ 07 ގައި.ސޯދިގު- މޭޔަރު
މޭޔަރު ސޯދިގު ވިދާޅުވީ އައްޑޫ ސިޓީގެ ތަރައްގީއަށް ހުރި ގިނަ މަޝްރޫއުތައް ހުއްޓި، ކުރިއަށް ނުގެންދެވުމުކީ އިގްތިސާދީ ގޮތުން ލިބުނު ބޮޑު ގެއްލުމެއް ކަމަށެވެ. މިދިޔަ ދުވަސްތަކުގަ އައްޑޫ ރައްޔިތުންނަށް 07 އަހަރުގެ މަޑު ޖެހުމަކީ އެއީ ފޫނުބެދޭ ވަރުގެ ގެއްލުމެއް ކަމަށާއި، ފަހަތަށް ދިޔަ ދުވަސްތަކެއް ކަމަށް މޭޔަރު ވިދާޅުވިއެވެ.
ނަމަވެސް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރާއެކު އައްޑޫގެ ރައްޔިތުންގެ ހުވަފެންތަކުގަ ކުލަ ޖެހި އައްޑޫގެ ތަރައްގީއަށް ގިނަ މަޝްރޫއުތައް ކުރިއަށްދާ ކަމަށެވެ. އަދި ކުރިއަށް އޮތީ އުފާވެރި ދުވަސްތަކެއް ކަމަށް މޭޔަރު ވިދާޅުވިއެވެ.
