ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ސަރުކާރުން ގެނެސްފައިވާ އިޞްލާޙުތަކާއެކު ރަށްރަށުގައި އިންތިޚާބު ކުރެވޭ މަޤާމުތަކުގައި ފިރިހެނުންނަށްވުރެ އަންހެނުން އިތުރު ވެއްޖެ އެވެ.

ލާމަރުކަޒީ ޤާނޫނަށް ގެނެވުނު މުހިއްމު ބަދަލުތަކުގެ ތެރޭގައި ކައުންސިލްތައް މާލީ ގޮތުން ބާރުވެރިކުރުމުގެ އިތުރުން، އަންހެނުން ބާރުވެރި ކުރުވުމަށް އިސްކަމެއް ވަނީ ދީފަ އެވެ.

އެގޮތުން، އަންހެން ބޭފުޅުންނަށް މިހާރަށްވުރެ އިތުރު ފުރުޞަތުތައް އެޤާނޫނުގެ ދަށުން ވަނީ ފަހިކޮށްދީފަ އެވެ. ކައުންސިލުތަކުގެ 33 އިން ސައްތަ އަންހެނުންނަށް ޚާއްޞަކޮށްފައިވާއިރު، ކައުންސިލަރުންގެ މަޤާމާއި ކައުންސިލްގެ ރައީސްގެ މަޤާމަށްވެސް ކުރިމަތި ލުމުގެ ފުރުޞަތު އަންހެން ބޭފުޅުންނަށް ލިބިގެންވެއެވެ.

އެހެންކަމުން ކޮންމެ ރަށު ކައުންސިލަކާއި ސިޓީ ކައުންސިލެއްގައި މަދުވެގެން 33 އިން ސައްތަ ތަމްސީލު ކުރާނީ އަންހެން ކަނބަލުން ނެވެ. މީގެ އިތުރުން ކޮންމެ ރަށެއްގައި އަންހެނުންގެ ތަރައްޤީއަށް މަސައްކަތްކުރާ ކޮމެޓީއަށް ވެސް ފަސް މެންބަރުން އިންތިޚާބު ކުރެވިގެންދާނެ އެވެ. އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބުވެސް ކުރިއަށްދާނީ ލޯކަލް ކައުންސިލްގެ އިންތިޚާބާއެކުގަ އެވެ.

މީގެ ނަތީޖާއަކީ، މީހުން ދިރިއުޅޭ 179 ރަށާއި 3 ސިޓީގައި، މަދުވެގެން 384 އަންހެން ބޭފުޅުން ކައުންސިލުތަކަށް އިންތިޚާބު ކުރެވިގެންދާނެ އެވެ. އަދި އަންހެނުންގެ ކޮމިޓީތަކަށް 929 އަންހެން ބޭފުޅުން އިންތިޚާބު ކުރެވިގެންދާނެ އެވެ. މި ޢަދަދުތަކަށް ބަލާއިރު، އަންނަ އޭޕްރީލް މަހު ބާއްވާ ލޯކަލް ކައުންސިލް އިންތިޚާބުގައި، ޖުމްލަ 1313 އަންހެން ބޭފުޅުން، އިންތިޚާބީ މަޤާމުތަކުގައި ރަށްރަށުގައި ތިއްބަވާނެ އެވެ. މިއީ، އިންތިޚާބު ކުރާ ޢަދަދު، ފިރިހެން ބޭފުޅުންނަށްވުރެ އިތުރު ޢަދަދެކެވެ.

ލާމަރުކަޒީ ޤާނޫނަށް ގެނެސްފައިވާ އެ އިޞްލާޙާއެކު، ރައްޔިތުންގެ ފައިސާގެ ވަރަށް ބޮޑު ބައެއް، ކައުންސިލްތަކާ ޙަވާލުކުރެވިގެންދާނެ އެވެ. އަދި ރައްޔިތުންގެ ތަރައްޤީއަށް ކުރަންޖެހޭ ވަރަށް ގިނަ މަސައްކަތްތައް ކައުންސިލްތަކާ ޙަވާލުކުރެވިގެންދާނެ އެވެ. ރައްޔިތުންގެ މައްޗަށް ބަސް ބުނެ، ގޮތް ނިންމުމުގެ ބާރު ވެސް ކައުންސިލްތަކަށް ލިބިގެން ދެއެވެ.