އިންފޯފިޝް ގަވަރނިންގް ކައުންސިލްގެ ބައްދަލުވުމުގައި ބައިވެރިވުމަށް ފީޖީގެ ފިޝަރީޒް މިނިސްޓަރ ސެމީ ކޮރޮއިލަވެސައު ރާއްޖެ ވަޑައިގަންނަވައިފިއެވެ.
ސެމީ ރާއްޖެ ވަޑައިގަތީ ހޮނިހިރު ދުވަހުއެވެ.
ފިޝަރީޒް މިނިސްޓްރީން ބުނީ 34 ވަނަ އިންފޯފިޝް ގަވަރނިންގް ކައުންސިލްގެ ބައްދަލުވުން ބޭއްވުމަށް ހަމަޖެހިފައިވަނީ ޑިސެމްބަރު މަހުގެ 16 އިން 19 ވަނަ ދުވަހުގެ ނިޔަލަށް ކަމަށެވެ. އަދި މި އަހަރު މި ކައުންސިލްގެ ރިޔާސަތު ބެލަހައްޓާނީ ރާއްޖެއިންނެވެ.
އިންފޯފިޝް އަކީ ދުނިޔޭގެ ކާބޯތަކެއްޗާއި ބެހޭ ޖަމުއިއްޔާ (އެފް.އޭ.އޯ) ގެ އެހީތެރިކަމާއި އެކު ހިންގާ ސަރަހައްދީ މެމްބަރު ގައުމުތައް ތަމްސީލުކުރާ ޖަމުއިއްޔާއެކެވެ. މި ޖަމިއްޔާގައި 13 ގައުމެއް އެކުލެވޭއިރު އިންފޯފިޝްއިން އޭޝިޔާއާއި ޕެސިފިކް ގައުމުތަކުގެ މަސްވެރިކަމާއި އެކުއާކަލްޗަރ ކުރިއަރުވާ ބައިނަލްއަގުވާމީ ވިޔަފާރި ފުޅާ ކުރުމަށް އެހީތެރިވެދީ، މާރކެޓްތަކާއި ގުޅުވައިދިނުމަށް މަގު ފަހި ކޮށްދެއެވެ.
