މޯލްޑިވްސް ބްރޯޑްކާސްޓިންގް ކޮމިޝަން (ބްރޯޑްކޮމް)ގެ ރައީސް ކަމަށް މަރިޔަމް ވަހީދާ (މަރީ) އަދި އެކޮމިޝަނުގެ ނައިބު ރައީސް ކަމަށް އަހުމަދު ގައިސް (ގައިސް) އައްޔަން ކޮށްފި އެވެ.
މަރީ އާއި ގައިސްއަކީ މިމަހުގެ ތިން ވަނަ ދުވަހު ބޭއްވި ރައްޔިތުންގެ މަޖިލީހުން އެކޮމިޝަނަށް ރުހުން ދިނުމަށް ފާސްކުރި ތިން މެމްބަރުންގެ ތެރެއިން ދެ މެމްބަރުން ނެވެ. ތިން ވަނަ މެމްބަރަކީ އަލީ ޔޫސުފް އެވެ.
ބްރޯޑްކޮމްގެ ރައީސް ކަމަށް މަރީ އަދި ނާއިބު ރައީސް ކަމަށް ގައިސް އައްޔަން ކޮށްފައިވަނީ އެކޮމިޝަނުން ބުރާސްފަތި ދުވަހު ބޭއްވި ބައްދަލުވުމުގަ އެވެ. ބްރޯޑްކޮމްގެ މެމްބަރުކަމަށް ގައިސް އާއި އަލީ ޔޫސުފަށް މަޖިލީހުން ރުހުން ދިނީ، އެކޮމިޝަނުގެ ކުރީގެ ނައިބު ރައީސް އިސްމާއިލް ސޮފްވާން އާއި އެކޮމިޝަނުގެ މެމްބަރު ހަސަން ނަބާހު އިސްތިއުފާދެއްވުމުން ހުސްވެފައިވާ އެ ދެމަގާމަށް ކުރިމަތިލުމުގެ ފުރުސަތު ހުޅުވާލުމުން ކުރިމަތިލި 36 ފަރާތުގެ ތެރެއިން ނެވެ.
ބްރޯޑް ކޮމްގެ ކުރީގެ ރައީސް މުހައްމަދު ޝަހީބު އިސްތިއުފާ ދެއްވުމާއި ގުޅިގެން ހުސްވެފައިވާ މެމްބަރުކަމުގެ މަގާމަށް ކުރިމަތިލުމުގެ ފުރުސަތު ހުޅުވާލުމުން ކުރިމަތި ލެއްވި ފަރާތްތަކުގެ ތެރެއިން މަޖިލީހުން ރުހުން ދީފައި ވަނިީ މަރީ އަށެވެ.
ބްރޮޑްކޮމްއަށް މެމްބަރުން ހޯދުމަށް އިއުލާން ކުރުމާއި، ކުރިމަތިލި ފަރާތްތަކުގެ ނަންތައް ރައްޔިތުންގެ މަޖިލީހަށް ފޮނުވަނީ ރައީސުލްޖުމްހޫރިއްޔާގެ އޮފީހުން ނެވެ.
ބުރާސްފަތި ދުވަހު ވަނީ ބްރޯޑްކޮމްއަށް އަލަށް ހޮވުނު މަރީއާއި ގައިސް އަދި އަލީ ޔޫސުފް މަގާމުގެ ހުވާކުރުމުގެ ރަސްމިއްޔާތު ރައީސް އޮފީހުގައި ބާއްވާފަ އެވެ.
