ރެންޓަލް އިންކަމް ލިބޭ ބައެއް ފަރާތްތަކުގެ މެދުގައި ހަމަހަމަކަން ގެއްލޭ އުސޫލެއްގެ މަތިން ޓެކްސް ނެގޭގޮތަށް އާމްދަނީން ޓެކްސް ނެގުމުގެ ބިލް ބައްޓަންވެފައިވާކަމަށް ވިދާޅުވެ އެކަމުގެ ކަންބޮޑުވުން ދާންދޫ ދާއިރާގެ މެމްބަރ ޔައުގޫބް އަބްދުﷲ ފާޅުކުރައްވައިފި އެވެ.

އާމްދަނީން ޓެކްސް ނެގުމުގެ ބިލްގެ ކޮމިޓީ ރިޕޯޓަށް ވާހަކަ ދައްކަވަމުން ޔައުގޫބް ވިދާޅުވީ ބިލް އޮތްގޮތުން ގެދޮރު ކުއްޔަށް ދޭ ފަރާތްތަކުން އޭނާއަށް ލިބޭ އާމްދަނީން ޓެކްސް ދައްކަންޖެހެނީ އެކި ބޭންޑުތަކުން ކަމަށެވެ. އެގޮތުން ތިން ބޭންޑެއްގެ ދަށުން ޓެކްސް ނެގޭއިރު ބީޕީޓީން ޓެކްސް ދައްކަންޖެހެނީ ފަސްލައްކަ ރުފިޔާއަށް ވުރެ މަތިން ފައިދާ ވާ ފަރާތްތަކުން 15 އިންސައްތަ ކަމަށް ޔައުގޫބް ވިދާޅުވި އެެވެ.

ޔައުގޫބް ވިދާޅުވީ ދެމީހެއް ނުވަތަ އެއަށްވުރެ ގިނަ މިހެއްގެ ނަންމަތީ އިންނަ އެޕާޓްމެންޓެއް ނުވަތަ ގެޔެއް ކުއްޔަށް ދޭ އިރު އެ ބަދަލުވެގެންދަނީ ވިޔަފާރިއަކަށް ކަމަށެވެ. އެހާލަތުގައި އެމީހުންގެ ވިޔަފާރިން ލިބޭ ފައިދާ 500،000 ރުފިޔާ އަށްވުރެ އިތުރު ނަމަ ޓެކުހުގެ ގޮތުގައި އާމްދަނީގެ 15 ޕަސެންޓު ދައްކަން ޖެހޭ ކަމަށް ޔައުގޫބް ވިދާޅުވި އެވެ. އަދި ހަމަ އެހެންމެ އެންމެ މީހަކުވެސް ގެ ކުއްޔަށްދީގެން ލިބޭ ފައިދާއިން ޓެކްސް ދައްކަންޖެހޭ ކަމަށާއި ނަމަވެސް އެއީ ވަކި ބޭންޑަކުން ކަމަަށް ޔައުގޫބް ވިދާޅުވި އެވެ.

ދެން ޔައުގޫބް ފާހަގަކުރެއްވި މައްސަލައަކީ ގެޔެއްގެ ވެރިއަކަށް އެކަކު ހުރެފައި އޭނާ މަރުވެގެންދާއިރު އޭނާގެ ވާރިސުންނަށް އެގެ ބެހިގެންދާއިރު ދެން ކަންތައް ވެގެންދާ ގޮތެވެ.

ޔައުގޫބު ވިދާޅުވީ ބިލު މިހާރު އޮތްގޮތުން ރެންޓަލް ޓެކްސް ދައްކާ މީހުންނަށް އޮތީ ތަފާތު އުސޫލުތަކެއް ކަމަށެވެ. އެހެންކަމުން ބިލު ފާސްކުރާއިރު އެފަދަ ފަރާތްތަކަށް ހަމަހަމަ އުސޫލެއް ގާއިމް ކުރުމަށް ގޮވާލާ ކަމަށް ޔައުގޫބް ވިދާޅުވި އެވެ.