މީހުން ޓްރެފިކް ކުރުން ހުއްޓުވުމުގެ ކަންކަން ވިލަރެސް ކުރާ ކޮމެޓީގެ މެމްބަރުންގެ އަދަދު 14 އިން 8 އަކަށް ބަދަލުކުރާ ގޮތަށް އިސްލާހެއް ހުށަހަޅައިފިއެވެ.

މީހުން ޓްރެފިކް ކުރުން ހުއްޓުވުމުގެ ގާނޫނަށް އިސްލާހު ގެނައުމުގެ ބިލް ހުށަހެޅުއްވީ ހިންނަވަރު ދާއިރާގެ މެމްބަރު ޖީހާން މަހުމޫދެވެ.

މެމްބަރު ހުށަހެޅުއްވި އިސްލާހުގައި ކޮމެޓީ އެކުލެވިގެންވާންޖެހެނީ 8 މެމްބަރުންގެ މައްޗަށެވެ.

މެމްބަރު ހުށަހެޅުއްވި އިސްލާހަކީ މިނިސްޓްރީ އޮފް ޖެންޑަރ އެންޑް ސޯޝަލް ސަރވިސަސް އިން ކަނޑައަޅާ އެ މިނިސްޓްރީގެ މުވައްޒަފަކު މި ލިސްޓަށް އިތުރު ކުރުމެވެ. ސަބަބަކަށް މެމްބަރު ވިދާޅުވީ ޓްރެފިކް ކުރެވޭ ގިނަ މީހުންނަކީ އަންހެނުން ކަމަށާއި ޚާއްސަގޮތެއްގައި 'ޑޮމެސްޓިކް' މަސައްކަތަށް ގެންނަ އަންހެނުން އޭގެ ތެރޭގައި ހިމެނޭތީ ކަމަށެވެ. އަދި މީގެތެރޭގައި ކުޑަކުދިންވެސް ޓްރެފިކް ކުރެވޭ ކަމަށް ޝައްކު އުފެދިފައިވާތީ އެ މައްސަލަތައް ބަލަމުންގެންދާއިރު އެ ކަންކަން ވިލަރެސް ކުރުމުގައި މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސެސްގެ ދައުރެއް އޮންނަން ޖެހޭ ކަމަށް ގަބޫލު ކުރައްވާ ކަމަށް މެމްބަރު ވިދާޅުވިއެވެ.

އިސްލާހު ހުށަހަޅުއްވަމުން މެމްބަރު ވިދާޅުވީ ފާއިތުވި ތިން އަހަރުގައި ވެސް މި ކޮމެޓީގެ ބައްދަލުވުމެއް ބޭއްވިފައިނުވާ ކަމަށެވެ. އަދި ކޮމެޓީގައި ދުވަހުން ދުވަހަށް ކުރަންޖެހޭ މަސައްކަތްތަކުގައި ކޮންމެހެން ލަފާ އަރުވާ ފަރާތްތަކާއި މަސްލަހަތު ފުށުއަރާ މުއައްސަސާތައް އެ ކޮމެޓީގައި ހިމެނުމުން ކޮމެޓީގެ ކޯރަމް ހަމަ ނުވުމުގެ ސަބަބުން ކޮމެޓީގެ ބައްދަލުވުންތައް ބޭއްވިފައިނުވާ ކަމަށެވެ. މި ބިލު ހުށަހެޅުމުގެ މަގްސަދަކީ އެ ކޮމެޓީގެ ހިންގުން ހަރުދަނާ ކުރުން ކަމަށް މެމްބަރު ވިދާޅުވިއެވެ.