ސިފައިންގެ މައި މަރުކަޒު ބަންޑާރަކޮށްޓަށް ވޭނެއްގައި މީހަކު ވަތް މައްސަލަ ފުލުހުންނާ ގުޅިގެން ތަހުޤީޤު ކުރަމުންދާ ކަމަށް މޯލްޑިވުސް ނެޝަނަލް ޑިފެންސް ފޯރސް (އެމްއެންޑީއެފް) އިން ބުނެފި އެވެ.

އެމްއެންޑީއެފުން މިހެން ބުނެފައި މިވަނީ، ބަންޑާރަކޮށްޓަށް ވޭނެއްގައި މީހަކު ވަދެ، އެމަރުކަޒު ''ގޮއްވާލާނެ" ކަމުގެ އިންޒާރު ދިން ކަމަށް ބުނެ، ބައެއް މީޑިއާތަކުން ޚަބަރު ފެތުރުމުންނާއި ގުޅިގެންނެވެ.

އެމައްސަލައާ ގުޅިގެން އެމްއެންޑީއެފުން ހޯމަ ދުވަހު ނެރުނު ނޫސްބަޔާނުގައި ބުނެފައިވަނީ، 18 ނޮވެމްބަރު 2019 ވީ ހޯމަ ދުވަހުގެރޭ، 21:00 ހާއިރު ބަންޑާރަކޮށި މައި ގޭޓުން ވޭނެއެއް ވަނުމާއެކު އެވަގުތު އެއުޅނަދު ހުއްޓުވާފައިވާ ކަމަށެވެ. އަދި ހުއްޓުވައި ޗެކު ކުރި އިރު ވޭން، ދުއްވަން އިނީ ބިދޭސީ މީހެއް ކަމަށާއި، އެއުޅަނދުގައި އިތުރު މީހަކު ނެތް ކަމަށް އެމްއެންޑީއެފުން ބުނެއެވެ.

މީގެ އިތުރުން އެމްއެންޑީއެފުން ވަނީ އެއްވެސް ގޮތަކަށް ޝައްކުކުރެވޭފަދަ އެއްވެސް ބާވަތެއްގެ ކަމެއް މީހެއްގެ ފަރާތުން ފެނިއްޖެހިނދެއްގައި، އެކަން ސަލާމަތީ ޚިދުމަތްތަކުގެ ސަމާލުކަމަށް ލަސްނުކޮށް ހިއްސާކުރުމަށް ރައްޔިތުންނަށް އިލްތިމާސްކޮށްފައެވެ. މި މައްސަލަ މޯލްޑިވްސް ޕޮލިސް ސަރވިސް އާ ގުޅިގެން އިތުރަށް ތަހުޤީޤު ކުރަމުންދާ ކަމަށް އެމްއެންޑީއެފުން މަޢުލޫމާތުދެއެވެ.

އިތުބާރު ހުރި ފަރާތަކުން ރާއްޖެއެމްވީއަށް މަޢުލޫމާތު ދިންގޮތުގައި، ބިދޭސީ މީހާ ބަންޑާރަކޮށްޓަށް ވަދެ، އެތަނުގައި ތިބި ސިފައިން ގައިގައި ތަޅައިގަނެ އެތަން ގޮއްވާލާނެ ކަމުގެ އިންޒާރުދީފައިވާ ކަމަށެވެ. މިޙާދިސާއާ ގުޅިގެން އެމްއެންޑީއެފުގެ ސެކިއުރިޓީ ވަނީ ވަރަށް ވަރުގަދަ ކޮށްފައެވެ.