ޕާޓީގެ ހަރަކާތްތަކުންނާއި، ސަޕޯޓަރުންގެ ކުރިމަތިން ކުޑަ ދުވަސްކޮޅަކަށް ގެއްލުނު ނަމަވެސް ހިތްތަކުން އެމަނިކުފާނުގެ ނަން ފޮހެނުލުމަށް ކުރީގެ ރައީސް ރައީސް އަބްދުﷲ ޔާމީން އެދިވަޑައިގެންފިއެވެ.

ބުދަ ދުވަހުގެރޭ ޕީޕީއެމް އޮފީސް ކުރިމަތީގައި ކުރިއަށް ގެންދިޔަ އެއްވުމުގައި ރައީސް ޔާމީން ވިދާޅުވީ ބުރާސްފަތި ދުވަހުގެ ޝަރީއަތުގެ ނަތީޖާ ނުކުންނަ ގޮތަކުން ހިތްދަތިކަމާއި، ގިލަންވެރިކަން އާއިލާއާ ސަޕޯޓަރުން ތަހައްމަލް ކުރާނެ ކަމަށެވެ.

ރައީސް ޔާމީން ވިދާޅުވީ ދުވަސްކޮޅަކަށް ރައްޔިތުންނާ ވަކިވާން ޖެހުނު ނަމަވެސް ސަޕޯޓަރުން، ޕީޕީއެމްގެ އިސްބޭފުޅުން ކުރާ ކަންކަމަށް ސަމާލުވެ، ޕާޓީގެ ހަރަކާތްތަކާއި، ބައްދަލުވުމުގައި ބައިވެރިވެ އެއްބާރުލުން ދިނުމަށް އެދޭ ކަމަށެވެ. އަދި އެމަނިކުފާނު ލޯމަތީގައި ފެންނަން ނެތް ނަމަވެސް ހިތްތަކުގައި އެމަނިކުފާނާ ދޭތެރޭގައި އޮންނަ ޝުއޫރު ފުހެނުލުމަށް ވަނީ އެދިވަޑައިގެންފައެވެ.

މީގެއިތުރުން ރައީސް ޔާމީން ވިދާޅުވީ ޕާޓީއަށް މިނިކާ ބާޒުތަކެއް ސަވާރުވުމަށް ޖާގަދީގެން ނުވާނެ ކަމަށާއި، އެކަން ކުރެވޭނީ ސަޕޯޓަރުންނަށް ކަމަށެވެ.

މިސަރުކާރަށް ވަރަށް ބޮޑަށް ފާޑުވިދާޅުވެ ރައީސް ޔާމީން ވިދާޅުވީ އެކިގޮތްގޮތުން ކުށްވެރިކޮށް އެމަނިކުފާނު ޖަލަށްލުމަށް މިސަރުކާރުން މަސައްކަތް ކޮށްފައިވާ ކަމަށާއި، އެކަން ކުރަނީ ދީނުގެ ހައްގުގައާ ގައުމުގެ ހައްގުގައި މިކުރާ މަސައްކަތުގެ އަޑުކަނޑުވާލަން ކަމަށާއި، އިލްމުވެރިން ހިމާޔަތްކުރުމަށް ކުރާ މަސައްކަތަށް ހުރަސް އެޅުމަށް ކަމަށެވެ.

ރައީސް ޔާމީން ވިދާޅުވީ އެމަނިކުފާނުގެ މައުސޫމްކަން ފުރަތަމަ ސާބިތުކޮށްދޭންޖެހެނީ ޝަރީއަތުގެ މަޖިލީހަށް ނޫން ކަމަށާއި، ފުރަތަމަ ހާމަކޮށްދޭންޖެހެނީ އަމިއްލަ އާއިލާއަށްށާއި، މަސައްކަތް ކުރަމުންދާ ސިޔާސީ އާއިލާއަށް ކަމަށެވެ. އަދި އެކަންކޮށްފައިވާ ކަމަށް ރައީސް ޔާމީން ވިދާޅުވިއެވެ.