އަމާޒަކީ 2020 ވަނަ އަހަރު ނިމޭއިރު އިޔާދަ ކުރަނިވި ހަކަތައިގެ 20 އިންސައްތަ އިތުރުކުރުންކަމަށް މިނިސްޓަރ އޮފް އެންވަޔަރަމަންޓް ޑރ ހުސައިން ރަޝީދު ހަސަން ވިދާޅުވެއްޖެ އެވެ.

އިޔާދަ ކުރަނިވި ކަހަތައިން ކަރަންޓް އުފެއްދުމާއި ގުޅޭގޮތުން ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީގައި ވާހަކަދައްކަވަމުން މިނިސްޓަރ ވިދާޅުވީ ރައްޔިތުންނަށް ހެޔޮ އަގުގައި ކަރަންޓް ފޯރުކޮށްދިނުމަށްޓަކައި ބިލިއަނަކާއި ގާތްކުރާ އަދަދުގެ ފައިސާ ހޭދަކުރަން ޖެހޭ ކަމަށެވެ. ނަމަވެސް އިޔާދަކުރަނިވި ހަކަތައިގެ ހިއްސާ ބޮޑު ކުރެވިއްޖެނަމަ އެ އަދަދު ކުޑަ ކުރެވޭނެ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ 2018 ވަނަ އަހަރާއި ހަމައަށް ރާއްޖޭގައި އުފެއްދިފައި ހުރީ 16 މެގަވޯޓްގެ އިޔާދަކުރަނިވި ހަކަތަ ކަމަށާއި އެއީ ގާތްގަނޑަކަށް 5.8 ޕަސެންޓް ކަމަށެވެ.

އިތުރަށް އުފައްދާ ކަރަންޓަކީ ޑީސަލަށް ބަރޯސާވެގެން ޑީސަލުން އުފައްދާ ކަރަންޓް ކަމަށެވެ. ޑީސަލް ގަތުމަށްޓަކައި ޖީޑީޕީގެ 10 އިން ސައްތައާއި ގާތްކުރާ އަދަދެއްގެ ފައިސާ ހޭދަ ކުރާކަމަށް މިނިސްޓަރ ވިދާޅުވިއެވެ.

އިޔާދަ ކުރަނިވި ހަކަތައިގެ 22 މެގަވޯޓް ރާއްޖޭގައި މިހާރު އުޅޭނެކަމަށާއި ކައިރި މުސްތަގްބަލެއްގައި އިތުރު 21 މެގަވޯޓް ޖެހުމުގެ ކަންތައް ހިންގަން ފަށަން ބޭނުންވާ ކަން މިނިސްޓަރ ވަނީ ފާހަގަ ކުރައްވާފައެވެ. އަދި ވޯލްޑް ބޭންކުން އެކަމަށް ހުއްދަ ލިބުނުހާ އަވަހަކަށް އެކަން ކުރައްވާނެ ކަމަށް މިނިސްޓަރ ވިދާޅުވި އެވެ.

2023 އާއި ހަމައަށް ސަރުކާރުގެ ވައުދުތައް ފުއްދުމަށް އެކުލަވާލާފައިވާ ދުރުރާސްތާ ޕްލޭން ގައި ކަނޑައަޅާފައިވާ އަމާޒަށް ވާސިލްވުމަށް ޖުމްލަ ބޭނުން ވަނީ 56 މެގްވޯޓް ކަމަށާއި އޭގެ ތެރެއިން 22 މެގަވޯޓް ހާސިލް ކުރެވިފައިވާ ކަމަށް މިނިސްޓަރ ވިދާޅުވިއެވެ.