އެތެރޭގެ އިންތިޚާބުތަކާއި ގުޅިގެން ޕާޓީ ތެރޭގައި ބައިބައިވުން އުފެދެން ނުޖެހޭ ކަމަށް ހުސްވެފައިވާ އެމްޑީޕީގެ ނައިބް ރައީސްގެ މަޤާމަށް ވާދަ ކުރައްވާ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.

ބުރާސްފަތި ދުވަހުގެރޭ އަސްލަމްގެ ކެމްޕޭން ނިންމުގެގޮތުން އައްޑޫ ސިޓީގައި ބޭއްވި ޖަލްސާގައި ވާހަކަދައްކަވަމުން އަސްލަމް ވިދާޅުވީ އެތެރޭގެ އިންތިޚާބުތަކާއި ޕްރައިމަތީ ތަކަކީ ސިޔާސީ ވާދަވެރިކަމެއްގެ ތެރޭގައި ހިންގޭ ސިޔާސީ ހަރަކާތެއް ކަމަށެވެ. އަދި އެ އިންތިޚާބެއް ނިމުމަށްފަހު އެނބުރި ރީނދޫ ޕޯޑިއަމަށް ރުޖޫޢަވާން އިނގެން ޖެހޭނެ ކަމަށެވެ.

އަސްލަމް ވިދާޅުވީ ރައްޔިތުންގެ މަޖިލީހުގެ ޕްރައިމަރީއަށްފަހު ބައެއް ރަށްރަށުގައި ޕާޓީ ދެބަޔަކަށް ބެހިފައިވާ ކަމަށެވެ.

ޕާޓީގެ އާންމު މެންބަރުންގެ މެދުގައި ބައިބައިވުން އުފެދޭ މައިގަނޑު ސަބަބަކީ ޕާޓީގެ އަސާސީ ޤަވާއިދުން ސާފުކޮށް ޕާޓީގެ ނައިބް ރައީސްގެ މައްޗަށް ލާޒިމް ކޮށްފައިވާ މަޤާމުގެ މަސްއޫލިއްޔަތު އަދާ ނުކުރެވި އޮތުން ކަމަށް ދެކެވަޑައިގަންނަވާ ކަމަށް އަސްލަމް ވިދާޅުވިއެވެ.

އިތުރަށް އަސްލަމް ވިދާޅުވީ ޕާޓީގެ އާންމު މެންބަރުންގެ ފަރާތުން ސާފުވެގެން ދިޔައީ ޕާޓީގެ މެންބަރުންނަށް ހައްގުވާ މިންވަރު މިއަދު ނުލިބޭކަން ކަމަށެވެ. އެ ހައްގުވާ މިންވަރު ހޯދައިދެއްވުމަށް ސާބިތުކަމާއި އެކު ދެމިހުންނަވާނެ ކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ އެމްޑީޕީއަކީ އެންމެ ބޮޑު އެންމެ ވަރުގަދަ އެންމެ ދުވަސްވީ ޕާޓީ ކަމަށާއި އަދި ހުރިހާ ގުނަވަންތަކެއްގައި މީހުން ހަމައަށް ތިބި ޕާޓީ ކަމަށެވެ. ނައިބް ރައީސްގެ މަޤާމަށް ވާދަ ކުރައްވަނީ ޕާޓީ އިތުރަށް ވަރުގަދަ ކުރަންޖެހޭކަމަށް ޤަބޫލުފުޅު ކުރެއްވުމުން ކަމަށްް އަސްލަމް ވިދާޅުވި އެވެ. އަދި ޕާޓީ އިތުރަށް ފުރިހަމައަށް ތަމްސީލްވާން ޖެހޭ ކަމަށް ގަބޫލު ކުރެވުމުން ކަމަށް އޭނާ ވިދާޅުވި އެވެ.

ޕާޓީގެ ލީޑަރޝިޕާއި އާންމު މެންބަރުންނާއި ދުރުކަން ޕާޓީގެ އާންމު މެންބަރުން ފާހަގަ ކުރާކަމަށް އަސްލަމް ވިދާޅުވިއެވެ. އެހެންކަމުން ޕާޓީގެ ހިންގުން އިތުރަށް ހަރުދަނާ ކުރުމަށްޓަކައި ކުރެވޭނެ ކަންކަމާއި މެންބަރުންގެ ހުރި ކަންބޮޑުވުންތަކާއި، ނުތަނަސްވަސްކަމާއި، ގުޅޭގޮތުން ޕާޓީގެ ކޮންގްރެސް އަހަރަކު އެއްފަހަރު ބާއްވަން ފެނިވަޑާއިގަންނަވާ ކަމަށް އަސްލަމް ވިދާޅުވި އެވެ.