ލުބްނާންގެ ބޮޑު ވަޒީރު ސައުދުލް ހަރީރީ އިސްތިއުފާ ދެއްވައިފިއެވެ.
އިސްތިއުފާ ދެއްވަމުން ހަރީރީ ވިދާޅުވީ، އެ ފަދައިން ނިންމެވީ ދެން ހަދާނެ އިތުރުގޮތެއް ނެތުމުންކަމަށެވެ.
އަންގާރަ ދުވަހު ހަރީރީ އިސްތިއުފާ ދެއްވާފައިވާއިރު، ސަރުކާރު އިސްތިއުފާއަށް ގޮވާލާ ލުބްނާންގައި މުޒާހަރާކުރާތާ ދެ ހަފްތާ ވަނީވެފަ އެވެ.
މި މުޒާހަރާތައް ފެށުނީ އައު ޓެކްސްތަކެއް ތަޢާރަފުކުރާނެކަން އިޢުލާންކުރުމާއި ގުޅިގެންނެވެ. މި އިއުލާންކޮށްފައިވަނީ 17 އޮކްޓޫބަރުގައެވެ.
ހަރީރީ އިސްތިއުފާ ދެއްވާފައި މިވަނީ، ސެންޓްރަލް ބޭރޫތުގައި ހުންނަ ކޭމްޕް ސައިޓަކަށް ހިޒްބުﷲ ޖަމާއަތަށް ތާއީދުކުރާ ގްރީޕަކުން ހަމަލާދިންތާ ގަޑި އިރުތަކެއް ފަހުންނެވެ.
ރިޕޯޓްތައް ބުނާގޮތުން އެ ކޭމްޕްސައިޓްގައި ތިބީ މުޒާހަރާގެ ބައިވެރިންނެވެ. އަދި މި ހަމަލާ ދީފައި މިވަނީ މަގުތައް ހުޅުވަން ޖެހޭކަމަށް ހިޒްބުﷲ ގެ ލީޑަރު ހަސަން ނަސްރަﷲ ވިދާޅުވެފައިވަނިކޮށެވެ.
މީގެ އިތުރުން، މުޒާހަރާކުރާ ފަރާތްތައްކަމަށް ފަންޑް ކުރަނީ ބޭރުގެ ދުޝްމަނުންކަމަށް ނަސްރަﷲ ވަނީ ތުހުމަތު ކުރައްވާފައެވެ.
ހަރީރީ އިސްތިއުފާ ދެއްވިކަން އިއުލާން ކުރެއްވުމުން، ގިނަ ބައެއް ވަނީ މަގުމަތީގައި އުފާ ފާޅުކޮށްފައެވެ.
