ޖިންސީ ގޯނާ ރިޕޯޓްކުރި އުމުރުން 19 އަހަރުގެ އަންހެން ކުއްޖެއް މިދިޔަ އެޕްރީލް މަހު ބަނގުލަދޭޝްގައި މަރާލިއިރު އެ ކުއްޖާ މަރާލި މައްސަލާގައި 16 މީހަކު މަރަން ހުކުމްކޮށްފިއެވެ.
ބަނގުލަދޭޝްގައި ހުންނަ ދީނީ ސްކޫލެއްގައި ކިޔަވަމުން ދިޔަ ނުސްރަތު ޖަހަން ރަފީއަށް ޖިންސީ ގޯނާ ކުރުމުން އެ މައްސަލަ ފުރަތަމަ ރިޕޯޓްކޮށްފައިވަނީ އެ ސްކޫލްގެ ހެޑްމާސްޓަރަށް ކަމަށް ހަބަރުތައް ލިބެއެވެ.
އެ މައްސަލާގައި އެ ސްކޫލްގެ ހެޑްމާސްޓަރު ހައްޔަރުކުރި އިރު ފުލުހުންނަށް ނުސްރަތު ދިން ބަޔާނުގެ ވީޑިއޯއެއް އާންމުކޮށްފައި ވެއެވެ. ނަމަވެސް އެ ވީޑިއޯގެ ސަބަބުން ހެޑްމާސްޓަރު ހައްޔަރުކުރުމުން އަވަށުގެ ރައްޔިތުންނަށް ގޯސްވީ ނުސްރަތުއެވެ.
އެ މައްސަލަ ރިޕޯޓްކުރިތާ 11 ދުވަސް ފަހުން ނުސްރަތު ސްކޫލަށް ދިޔުމުން އެ ކުއްޖާގެ ގައިގައި ވަނީ ރޯކޮށްލާފައެވެ. އަދި އެ އަނިޔާތަކުގެ ސަބަބުން ނުސްރަތު ވަނީ މަރުވެފައެވެ. އެހެން ނަމަވެސް އޭނާ ވަނީ މަރުވުމުގެ ކުރިން އޭނާ އަށް ހަމަލާދިން މީހުންގެ ނަންތައް މަރުވުމުގެ ކުރިން ހާމަކޮށްފައެވެ.
ނުސްރަތުގެ މަރުގެ މައްސަލާގައި މަރަން ހުކުމްކުރި މީހުންގެ ތެރޭގައި ހެޑްމާސްޓަރާއި އެ ސްކޫލްގެ ދެ ދަރިވަރުން ހިމެނުނު އިރު އޭނާގެ އާއިލާއިން ވަނީ އެ ހުކުމަށް ތާއިދުކޮށް އަވަހަށް ހުކުމް ތަންފީޒުކުރުމަށް ގޮވާލާފައެވެ.
އެ އަންހެން ކުއްޖާގެ މަރަށް ފަހު ބަނގުލަދޭޝްގައި ވަނީ ސްކޫލްތަކުގައި ޖިންސީ އަނިޔާކުރުން ހުއްޓަން ކޮމެޓީތައް ހެދުމަށް އަންގާފައެވެ.
