މާލޭގައި މިނީ ބަހުގެ ޚިދުމަތް ތައާރަފްކުރުމަށް ލަސްވެގެންދަނީ ފައިސާގެ ކަންކަން ހަމަނުޖެހިގެން ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި މިނިސްޓަރު ނަހުލާ ވިދާޅުވީ މިނީ ބަސް ތައާރަފްކުރުމަށް މިނިސްޓްރީން ކުރަންޖެހޭ ހުރިހާ މަސައްކަތެއްކޮށް ނިމިފައިވާ ކަމަށާއި، އެމަސައްކަތް މިހާރު އެމްޓީސީސީއާ ހަވާލުކޮށްފައިވާ ކަމަށެވެ. މިނިސްޓަރު ވިދާޅުވީ އެމްޓީސީސީން އެކަން ކުރިއަށް ނުގޮސް އޮތީ ފައިނޭންސް ހަމަ ނުޖެހޭތީ ކަމަށާއި، ފައިނޭންސް ހަމަޖެހުނުހާ އަވަހަށް އެމަސައްކަތް ކުރިއަށްދާނެ ކަމަށެވެ.
މިނިސްޓަރު ނަހުލާ ވިދާޅުވީ މިނީ ބަސް ތައާރަފްކުރުމަކީ ވެސް ހަރަދު ހިނގާނެ ކަމެއް ކަމަށާއި، މިމަސައްކަތަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ދަތުރުފުޅުގެ ތެރެއިން މިކަމަށް ބޭނުންވާ ފަންޑު ހޯދުމަށް މަސައްކަތްފުޅު ކުރައްވާ ކަމަށެވެ. އަދި އުންމީދު ކުރަނީ މިފެށޭ އަހަރުގެ ތެރޭގައި ޖެނުއަރީ ނުވަތަ ފެބްރުއަރީ ހިސާބުގައި މިމަސައްކަތް ކުރިއަށްދާނެ ކަމަށެވެ.
ކޮންމެ ބަހެއްގަ ބަލަންޖެހޭ ކަންކަންހުރޭ. ހަދަން ޖެހޭ ސައިޒްއާ، ސީޓް ހުންނަންޖެހޭ ވަރު ކަނޑައަޅާ ނިމިފަ. ދެން އަޅުގަނޑުމެން ވަނީ އެމަސައްކަތް އެމްޓީސީސީއާ ހަވާލުކޮށްފަ. އެމްޓީސީސީ އެކަން ކުރިއަށް ނުގޮސް އޮތީ. ކުރިއަށް ނުގޮސް އޮތީ އެކަމުގެ ފައިނޭންސް ހަމަނުޖެހިގެން ކަމަށް ވަނީ. އެހެންވީމަ ފައިނޭންސް ހަމަޖެހުނީމަ މަސައްކަތް ކުރިއަށްދާނެ ކަމަށް ގަބޫލުކުރަނީ. ޓްރާސްޕޯޓް މިނިސްޓްރީން ކުރަންޖެހޭ މަސައްކަތެއް ނޯންނޭނެ މިހާރު. މަސައްކަތް ނިންމާފައި އޮތީ.އާއިޝަތު ނަހުލާ / ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރ
މިނީ ބަހުގެ ޚިދުމަތް ފެށުމަށް ކުރަން ޖެހޭ ކަންތައްތައް ކުރުމަކީ ސަރުކާރުގެ 100 ދުވަހުގެ ވައުދުތަކުގެ ތެރޭގައި ހިމެނޭ ކަމެކެވެ.
