ރާއްޖޭގެ އެންމެ ކާމިޔަބު އެއް ޕްރޮޑަކްޝަން ކަމަށްވާ ޑާކް ރެއިން އެންޓަޓެއިންމެންޓުގެ ފިލްމަކުން އަވަސް މުސްތަގުބަލެއްގައި ފެނިގެން ދިޔުން އެކަށީގެންވާ ކަމަށް މޯލްޑިވިއަންގެ ޕަބްލިކް ރިލޭޝަންސް އެންޑް ކޮމިއުނިކޭޝަންސް މެނޭޖަރަކަށް މޫސާ ވަސީމް ވިދާޅުވެއްޖެއެވެ.
ޑާކް ރެއިނުން ވަނީ ދާދި ފަހުން އެ ޕްރޮޑަކްޝަންގެ ސްޓޫޑިއޯގައި މޫސާއާ އެއްކޮށް ނަގާފައިވާ ފޮޓޯއެއް އާއްމުކޮށްފައެވެ.
އެކަމާއި ގުޅޭ ގޮތުން ރާއްޖެ.އެމްވީ އަށް މައުލޫމާތު ދެއްވަމުން މޯލްޑިވިއަން އައިޑޮލްގެ ކުރީގެ ޕްރެޒެންޓަރު މޫސަ ވިދާޅުވީ، ދިވެހި ފިލްމުތަކުގެ ތެރެއިން ގިނަ ފަހަރަށް ޑާކްރެއިންގެ ފިލްމުތަކަކީ ވަރަށް ކަމުދާ ފިލްމުތަށް ކަމަށެވެ. އެގޮތުން ޑާކް ރެއިންގެ ފިލްމު ''ހޭލާ'' އަކީ ފާހަގަކޮށްލެވޭ ފިލްމެއް ކަމަށް ޓީވީއެމްގެ ވަޒީފާ އަދާކޮށްފައިވާ މޫސާ ވިދާޅުވިއެވެ.
ޑާކްރެއިންގެ ފިލްމަކުން ފެނިދާނެތޯ އަދި އެއީ ކޮން ފިލްމެއްތޯ ސުވާލު ކުރުމުން އޭނާ ވިދާޅުވީ، ޑާކްރެއިން ފިލްމަކުން ފެނިގެން ދިޔުން އެކަށީގެންވާ ކަމަށެވެ. އެހެން ނަމަވެސް އެއީ ކޮން ފިލްމެއް ކަމެއް މޫސާ ވިދާޅެއްނުވެއެވެ.
ޓީވީއެމް ގައި 10 އަހަރަށްވުރެ ގިނަ ދުވަސްވަންދެން ވަޒީފާ އަދާކުރެއްވި މޫސާ ވަސީމް އަކީ މީޑިއާގެ ދާއިރާ އިން ފުރަތަމަ ޑިގްރީ ހާސިލްކޮށްފައިވާ ބޭފުޅެކެވެ. މޯލްޑިވިއަންގެ ކޮމިއުނިކޭޝަން މެނޭޖަރު ކަމުގެ މަގާމަށް މޫސާ އައްޔަން ކޮށްފައިވަނީ، މި އަހަރުގެ ޖެނުއަރީ މަހުއެވެ.
