ހޯމަ ދުވަހުގެ މަޖިލީހުގެ ޖަލްސާއަށް މިނިސްޓަރ އޮފް އެންވަޔަރަންމަންޓް، ޙުސައިން ރަޝީދު ޙަސަން ހާޒިރުކުރުމަށް އެޖެންޑާކޮށްފި އެވެ.

މަޖިލީހުގެ ޖަލްސާއަށް މިނިސްޓަރ ހާޒިރު ކުރުމަށް ހުށަހެޅުއްވީ ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދެވެ.

މިނިސްޓަރ މަޖިލީހަށް ހާޒިރު ކުރުމަށް ހުށަހެޅުއްވީ ޕީއެސްއައިޕީގެ ޕްރޮޖެކްޓުގެ ގޮތުގައި، ވ. ފުލިދޫގެ ކުނިކޮށި މި އަހަރު ބަޖެޓު ކުރެވިފައިވީއިރު މި މަސައްކަތް ކޮންޓްރެކްޓުގެ އުސޫލުން ބަޔަކާއި ޙަވާލުކުރެވޭނެ ތާރީހާއި ގުޅިގެން ސުވާލު ކުރެއްވުމަށެވެ. އަދި މީގެއިރުތުން ވ. ފުލިދޫގެ ކުނިކޮށީގެ މަސައްކަތް މި އަހަރު ތެރޭގައި ފެށޭނެތޯއާއި ކުނިކޮށި ޤާއިމުކުރުމަށްޓަކައި މިހާރު ކުރެވިފައިވާ މަސައްކަތްތަކުގެ ތަފްޞީލާއި ގުޅިގެން ވެސް މެމްބަރު މިނިސްޓަރާއި ސުވާލު ކުރައްވާނެއެވެ.

އޭގެއިތުރުން ހޯމަ ދުވަހުގެ މަޖިލީހުގެ ޖަލްސާގައި ޤާނޫނުއަސާސީގެ 115 ވަނަ މާއްދާގެ (ދ) ގައިވާ ގޮތުގެމަތިން، ސަޢުދީ ޢަރަބިއްޔާއަށް ދިވެހިރާއްޖެއިން ކަނޑައަޅާފައި ހުންނަވާ ސަފީރު މުޙައްމަދު ޚަލީލް، އޯގަނައިޒޭޝަން އޮފް ދި އިސްލާމިކް ކޯޕަރޭޝަން (އޯ.އައި.ސީ) އަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމަށް ހަމަޖެއްސުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކޮށް ގޮތެއް ނިންމާ، އެމައްސަލައާއި ގުޅޭ ދާއިމީ ކޮމިޓީއަށް ފޮނުވުންވެސް ވަނީ އެޖެންޑާ ކުރެވިފައެވެ. އަދި ކޮމިޝަނަރ ޖެނެރަލް އޮފް ޓެކްސޭޝަންއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ޢައްޔަންކު ރުމަށްޓަކައި، ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކޮށް ގޮތެއް ނިންމުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުވުން ވެސް ވަނީ އެޖެންޑާ ކުރެވިފައެވެ.

ކޮމިޝަނާގެ މަގާމަށް ދެ ބޭފުޅަކު އަދި ޑެޕިއުޓީ ކޮމިޝަނަރަކަށް ހަ ބޭފުޅަކު ކުރިމަތިލެއްވި އެވެ. މީރާގެ ގާނޫނަށް ގެނައި އިސްލާހު މިދިޔަ މަހުގެ 12 ވަނަ ދުވަހު ރައީސް އިބްރާހިމް މުހައްމަދު ސޯލިހު ތަސްދީގު ކުރެއްވިއިރު، އެ އިސްލާހު ބުނާ ގޮތުން 30 ދުވަހުގެ ތެރޭގައި މީރާ އަށް ވެރިން އައްޔަން ކުރަން ޖެހެ އެވެ.

އޭގެއިތުރުން ބްރޯޑްކާސްޓިން ކޮމިޝަންގެ މެމްބަރުންކަމުން ދެ ބޭފުޅަކު ވަކިކުރުމުގެ މައްސަލަވެސް މާދަމާގެ ޖަލްސާއަށް އެޖެންޑާކޮށްފައިވެއެވެ. ނަމަވެސް އޭގެތެރެއިން ކޮމިޝަންގެ ރައީސް މުހައްމަދު ޝާހީބު މަޤާމުން އިސްތިއުފާ ދެއްވާފައިވާއިރު، ދެން ވޯޓަށް އަހާނީ ބްރޯޑްކާސްޓިން ކޮމިޝަންގެ ނައިބް ރައީސާ ފާތުމަތު ޒައިނާގެ އިތުބާރު ނެތްކަމުގެ މައްސަލާގައި އެކަނި އެވެ.