އަނިޔާވެރި ރަހުމުކުޑަގޮތަކަށް މަރާލަފައިވާ ސޯޝަލް މީޑިއާ އެކުޓިވިސްޓު އަދި ބްލޮގަރ ޔާމީން ރަޝީދު މަރާލި މައްސަލައިގައި، މިނިވަން އިންސާފުވެރި ޝަރީއަތެއް ހިންގުމަށް ސަރުކާރުން ފުރުސަތު ހޯދައިދޭންޖެހޭކަމަށް ގެއްލުވާލަފައިވާ މީހުންނާއި މަރާލައިފދާއިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ރައީސް ހުސްނުއްސުއޫދު ވިދާޅުވެއްޖެއެވެ.
ސުއޫދު މިހެން ވިދާޅުވެފައިވަނީ ބުރާސްފަތި ދުވަހު ބޭއްވި ޝަރީއަތުގައި ދައުލަތުން ހެކިންގެ ގޮތުގައި ހުށަހަޅާފައި ތިބި ބައެއް މީހުންނަށް ހަމަލާދިން މައްސަލަތަކެއް ފެންމަތިވެ، އަދި ބައެއް ހެކިން ހެކިބަސް ދޭން ދެކޮޅު ހަދާތީ އެ މީހުންގެ ބައި ދައުލަތުރުން ގެންގޮސްފައިވުމާއި ގުޅިގެންނެވެ.
ބުރާސްފަތި ދުވަހުގެ އަޑުއެހުމުގައި ދެ ހެކިވެރިއެއްގެ ބަސް ނަގަން ވަނީ ހަމަޖައްސާފައެވެ. ނަމަވެސް އޭގެތެރެއިން އެއް ހެކިވެރިއަކު ހެކިބަސް ދެން ބޭނުންނުވާ ކަމަށް ބުނެ ހާޒިރުވެފައި ނުވާއިރު، އެ މައްސަލައިގެ ބައެއް ހެކިންނަށް ބިރު ދެއްކުމުގެ އިތުރުން ޖިސްމާނީ އަނިޔާ ދީފައި އެބަހުރި ކަމަށް ދައުލަތުން ވަނީ ބުނެފައެވެ.
މީގެއިތުރުން ދައުލަތުން ވަނީ ސިއްރު ހެކިވެރިން ހެކިބަސް ދޭން ދެކޮޅު ހަދަމުންދާތީ އޭގެ ތެރެއިން ދެ ހެކިވެރިއެއްގެ ހެކިބަސް ނުނަގަން ނިންމައި، ހެކިންގެ ލިސްޓުން އެ މީހުންގެ ބައި އުނިކޮށްފައެވެ.
ދައުލަތުން ހުށަހަޅާފައިވާ ކްރައިމް ސީން އޮފިސާރސް ރިޕޯޓްތަކުގެ ތެރެއިން ހަތަރު ރިޕޯޓެއް، އެ ރިޕޯޓް ހެދި ފުލުސް މީހާ ރާއްޖެއިން ބޭރުގައި ހުރުމުން، ހެކި ލިސްޓުން އުނިކުރަން ދައުލަތުން ވަނީ ނިންމައިފައެވެ.
މިކަމާއި ގުޅިގެން ހުސްނުއްސުއޫދު ކޮށްފައިވާ ޓުވީޓެއްގައި ބުނެފައިވަނީ، ޔާމީން ރަޝީދުގެ ޝަރީއަތް ކުރިޔަށްދާގޮތުން ވަރަށް ބޮޑަށް ކަންބޮޑުވާކަމަށާއި، ރާއްޖޭގެ ޝަރުއީ ދާއިރާއިން މިނިވަން އިންސާފުވެރި އަދި އަވަސް ޝަރީއަތެއް ހިންގުމަށް ފުރުސަތު ހޯދައި ނުދެވޭކަމުގައި ވާނަމަ، ސަރުކާރުން އެ ފުރުސަތުތައް ހޯދައިދީ، އާއިލާއަށް އިންސާފު ހޯދައިދޭންޖެހޭކަމަށެވެ.
ޔާމީން މަރާލި މައްސަލައިގައި، ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ކުށުގެ ދައުވާ އުފުލައިފައި ވަނީ މ. އަންނާރުމާގޭ އިސްމާއިލް ހައިޝަމް ރަޝީދާއި، މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއިލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ އިތުރުން މ. އިރާސްމިކުގެ އަހުމަދު ޒިހާން އިސްމާއިލްގެ މައްޗަށެވެ.
