މަނީ ލޯންޑަރ ކުރި ކަމުގެ ތުހުމަތުގައި އަބޫ ހަނީފް ރާއްޖެއިން ޑީޕޯޓްކޮށްލި މައްސަލައިގައި ކޮންޓްރޯލަރ އޮފް އިމިގްރޭޝަން މުހައްމަދު ހުސައިން (ހަނަފީ) އާއި ފުލުހުންގެ އިދާރާގެ ބޭފުޅުން ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީއަށް ހާޒިރުކުރަން ނިންމައިފިއެވެ.
އަބޫ ހަނީފް ޑީޕޯޓްކޮށްލި މައްސަލައިގައި ކޮންޓްރޯލަރ އޮފް އިމިގްރޭޝަން އާއި ފުލުހުންގެ އިދާރާގެ ބޭފުޅުން ކޮމިޓީއަށް ހާޒިރުކުރަން ހުށަހެޅުއްވީ ވިލިމާލެ ދާއިރާގެ މެމްބަރު އަހްމަދު އުޝާމްއެވެ.އާދީއްތަދުވަހު ބޭއްވި ކޮމިޓީގެ ބައްދަލުވުމަށް އުޝާމް މި މައްސަލަ ހުށަހެޅުއްވުމުން، ކޮމިޓީން ނިންމާފައިވަނީ މި މަހުގެ 15 ވަނަ ދުވަހު، އެ ބޭފުޅުން ކޮމިޓީއަށް ހާޒިރުވުމަށް ސިޓީއެއް ފޮނުވަމަށެވެ.
ބަންގްލަދޭޝްގެ ރައްޔިތެއް ކަމަށްޗާ އަބޫ ހަނީފް އިމިގްރޭޝަން އިން ޑީޕޯޓްކޮށްލާފައިވަނީ މަނީ ލޯންޑާރ ކުރުމުގެ މައްސަލައާއި ގުޅިގެންނެވެ. އަބޫ ހަނީފްގެ މައްޗަށް ތުހުމަތުކުރެވިފައިވަނީ މަނީ ލޯންޑާރކުރުމާއި، އެ ނޫންވެސް ގިނަ ކުށްތަކެއް ކުރިކަމުގެ ތުހުމަތެއެވެ. ފުލުހުންގެ އިދާރާއަށް އެ މައްސަލަ ހުށަނާޅައި އޭނާ ޑީޕޯޓްކޮށްލުމާއި ގުޅިގެން، ގިނަ ފަރާތްތަކެއްގެ ފާޑުކިޔުން ވަނީ އިމިގްރޭޝަނަށް އަމާޒުވެފައެވެ.
އެކަމާއި ގުޅިގެން ކޮންޓްރޯލަރ އޮފް އިމިގްރޭޝަން ހަނަފީ ވިދާޅުވެފައިވަނީ އޭނާ އަކީ ޤާނޫނާއި ޚިލާފްވެފައިވާ މީހެއްކަން އެގުނީ އޭނާ ފުރަން ގޮސް ހުއްޓައި ކަމަށެވެ. އެކަމުގައި އިމިގްރޭޝަނުން އަމަލުކޮށްފައިވަނީ، ކުރިންވެސް އެފަދަ ފަރާތްތަކާއި ދޭތެރޭ އިމިގްރޭޝަނުން ކަންތައް ކުރަމުން އަންނަ އުސޫލުން ކަމަށެވެ.
ގަވައިދާ ޚިލާފަށް ރާއްޖޭގައި އުޅޭ ބިދޭސީން ހޯދައި ގާނޫނަށް ފެއްތުމާއި ޑީޕޯޓް ކުރަންޖެހޭނަމަ އެކަން ކުރުމުގެ އޮޕަރޭޝަނެއް ވަނީ ފަށާފައެވެ. އެ އޮޕަރޭޝަންގެ ތެރެއިން ގަވައިދާ ހިލާފަށް ބިދޭސިން ރެކްރޫޓް ކުރުމާއި ފުޅާ ދާއިރާއެއްގައި ވިޔަފާރި ކުރަމުން އައި ބަންގްލަދޭޝްގެ މީހަކު ވެސް ވަނީ ޑީޕޯޓް ކޮށްލާފައެވެ.
