ސައުދީ ރަސްގެފާނު، ސަލްމާން ބިން އަބްދުލް އަޒީޒް ރާއްޖެ ވަޑައިގަތުމަށް ހަމަޖެހިފައިވަނީ އަންނަ ހޮނިހިރު ދުވަހުގައިކަން ރާއްޖެއެމްވީއަށް އެނގިއްޖެ އެވެ.
އޭޝިއާގެ ޤައުމުތަކަށް ސައުދީ ރަސްގެފާނު ސަލްމާން ބިން އަބްދުލް އަޒީޒް ފައްޓަވާފައިވާ ދަތުރުފުޅުގެ ތެރެއިން ރާއްޖެ ވަޑައިގަތުމަށް ހަމަޖެހިފައިވާކަން ސައުދީ ސަރުކާރުން ވަނީ ކަށަވަރު ކޮށްދީފައެވެ. ނަމަވެސް ސައުދީ ރަސްގެފާނު ރާއްޖެ ވަޑައިގަތުމަށް ހަމަޖެހިފައިވާ ތާރީހެއް، ދެ ސަރުކާރުންވެސް ހާމަކޮށްފައެއް ނުވެއެވެ. ދެ ސަރުކާރުންވެސް، އެ މައުލޫމާތު ވަނީ ސިއްރުކޮށްފަ އެވެ.
ރާއްޖެއެމްވީއަށް އިތުބާރުހުރި މަސްދަރުތަކުން ކަށަވަރު ވެފައިވާގޮތުގައި ސައުދީ ރަސްގެފާނު، ސަލްމާން ބިން އަބްދުލް އަޒީޒް ރާއްޖެ ވަޑައިގަތުމަށް ހަމަޖެހިފައިވަނީ ހޮނިހިރު ދުވަހުގެ ވަގުތެއްގަ އެވެ. އަދި ހޮނިހިރު ދުވަހު ދެ ޤައުމުގެ އިސްވެރިންގެ މަޝްވަރާތައް ކުރިއަށްގެންދިއުމަށް ހަމަޖެހިފައިވާކަން ވަނީ އެނގިފަ އެވެ. މަޝްވަރާތަކަށްފަހު، ޗުއްޓީ ހޭދަކުރެއްވުމަށް ރިސޯޓަށް ވަޑައިގެންނެވުމަށް ވަނީ ހަމަޖެހިފަ އެވެ. އަދި ޗުއްޓީގައި ސައުދީ ރަސްގެފާނު ފަސް ދުވަހު ރާއްޖޭގައި މަޑުކުރައްވާނެކަން އެނގިފައިވެއެވެ.
ސައުދީ ރަސްގެފާނު، ރާއްޖެ ވަޑައިގަންނަވާއިރު، އެމަނިކުފާނަށް މަރުހަބާ ދެނެންވުމަށް ޖުމްހޫރީ މައިދާން ސަރަހައްދާއި، ރަސްމީ ފާލަން ހިމެނޭ ސަރަހައްދު އަންނަނީ ރައްޔާރުކުރަމުންނެވެ. އަދި އެމަނިކުފާނުގެ ސަލާތީކަންކަން ބެލެހެއްޓުމަށް ދެ ޤައުމުގެ ގިނަ އަދަދެއްގެ ސިފައިން މިހާރު ހަރަކަތްތެރި ވަމުންގެންދާއިރު، ސައުދީ ރަސްގެފާނާއި، އެމަނިކުފާނުގެ ވަފުދު ރާއްޖޭގައި ޗުއްޓީ ހޭދަކުރުމަށް ހަމަޖެހިފައިވާ ތިން ރިސޯޓްގެ ސަލާމަތީކަންކަން ވަރަށް ވަރުގަދަކުރަމުން އަންނަކަން އެނގިފައިވެއެވެ.
ސަލާމަތީ ކަންކަމުގައި ބައިވެރިވުމަށް ސައުދީ އަސްކަރިއްޔާގެ މަނަވަރާއި، އިތުރު ސާމާނާއި ރާއްޖޭގައި އަންނަނީ ބޭނުންކުރެވެމުނެވެ. އަދި ސައުދީ ރަސްގެފާނުގެ ދަތުރުފުޅާއި ގުޅުއްވައި ގިނަ މީޑިއާތަކެއްވެސް މިހާރު ރާއްޖޭގައި ހަރަކާތްތެރި ވަމުންގެންދެ އެވެ.
ސައުދީގެ ޝާހީ އާއިލާއިން ރާއްޖޭގައި ބޮޑު އިންވެސްޓްމެންޓެއްކުރުމަށް ހަމަޖެހިފައިވާކަމަށް ރައީސް އަބްދުﷲ ޔާމީން މީގެކުރިން ވިދާޅުވެފައިވީނަމަވެސް ސައުދީ އެމްބަސީން ވަނީ އެ ވާހަކަތައް ދޮގުކޮށްފަ އެވެ. އެހެންކަމުން ފ. އަތޮޅު ވިއްކާލުމުގެ އެއްބަސްވުން މިހާރު ވަނީ ބޮޑު އޮޅުމެއްގެ ތެރޭގަ އެވެ. ލިބިފައިވާ ބައެއް މައުލޫމާތުތަކަށް ބަލާއިރު، ކުރިއެކޭވެސް އެއްގޮތަށް "ފްރީހޯލްޑް" އުސޫލުން ފ. އަތޮޅުން ބައެއް ސައުދީ ސަރުކާރަށް ވިއްކާލުމަށް ވަނީ ހަމަޖެހިފަ އެވެ. އަދި ދެ ސަރުކާރުގެ ވާހަކަތައް ކުއްލިގޮތަކަށް ބަދަލުކޮށްފައިވަނީ އާންމު ރައްޔިތުންގެ ހިތްހަމަނުޖެހުން އިންތިހާއަށް އިތުރުވެ، ހަމަނުޖެހުމެއް ހިނގުމަށް މަގުފަހިވެދާނެތީކަމަށްކަން ވަނީ އެނިގިފަ އެވެ.
ސައުދީ ރަސްގެފާނަކީ، އެމަނިކުފާނުގެ ދަތުރުފުޅުތަކަށް ބޮޑު ހަރަދެއް ކުރައްވާ ބޭފުޅެކެވެ. އެގޮތުން ދުނިޔޭގެ އެހެން ވެރިންނާއި، ހިލާފަށް ކޮންމެ ދަތުރުފުޅަކާއި ދިމާކޮށް ބޭކާރު އެތަށް ހަރަދެއްކުރައްވާކަމަށް މީޑިއާ ރިޕޯޓްތަކުގައިވެއެވެ.
