ސަރުކާރުގެ އެއްފަސްކުރުމުގެ ސިޔާސަތުގެ ދަށުން 2011ވަނަ އަހަރު، ހދ.ނޮޅިވަރަންފަރަށް ބަދަލުކުރި ތިން ރަށުގެ އާއިލާތަކުގެ ތެރެއިން ދާއިމީ ގޮތުގައި ބޯހިޔާވަހިކަން ނުދެވި ހުރި އާއިލާ ތަކަށް ބަދަލުގައި ފައިސާގެ އެހީ ދޭން ނިންމައިފިއެވެ.
ނޮޅިވަރަންފަރަށް ބަދަލުކޮށްފައިވަނީ ކުނބުރުދޫ، މާވައިދޫ އަދި ފަރިދޫގެ އާއިލާތަކެވެ.
އެރަށަށް ބަދަލުކުރި ކޮންމެ އާއިލާއަކަށް ސަރުކާރުން ދޭން ނިންމާފައިވަނީ 156000 ރުފިޔާގެ އެހީކަމަށް ވާއިރު އެ އަދަދުގެ ފައިސާ އަކީ ތިން ރަށުން މީހުން ބަދަލުކުރި ތާރީހުން ފެށިގެން ފާއިތުވި މުއްދަތުގެ ތެރޭގައި ކޮންމެ މަހަކަށް 3000 ރުފިޔާގެ ރޭޓުން ބަލާފައެވެ.
ނޮޅިވަރަންފަރު ކައުންސިލުން ބުނީ، އެރަށަށް ބަދަލުކޮށްފައިވާ ތިން ރަށުގެ އާއިލާތަކުގެ މީހުންގެ ތެރެއިން ދާއިމީ ބޯހިޔާވަހިކަން ނުދެވި ހުރި އާއިލާތަކަށް ފައިސާގެ އެހީ އެއްފަހަރާ ދެވެން ނެތް ކަމަށާއި ފައިސާ ހަވާލު ކުރާނީ ތިން ފިޔަވައްސަކަށް ބަހާލައިގެން ކަމަށެވެ.
އެރަށު ކައުންސިލުން ބުނީ މިހާރު ފުރަތަމަ ފިޔަވަހީގައި ދިނުމަށް ހަމަޖެހިފައިވާ ފައިސާ އެ ކައުންސިލަށް ލިބިފައިވާ ކަމަށާއި ފުރަތަމަ ފިޔަވަހީގައި ކޮންމެ އާއިލާ އަކަށް ދިނުމަށް ހަމަޖެހިފައިވަނީ 117000 ރުފިޔާ ކަމަށެވެ.
ކައުންސިލުން އިތުރަށް ބުނީ ފައިސާ ލިބެންވާ ގޭގެ ވެރިފަރާތުން ކައުންސިލް އިދާރާއަށް ހެނދުނު 9:00 އިން މެންދުރު 12:00 އާ ދޭތެރޭ ދެ ހެކިހެންނާއެކު ގޮސް އެދެވޭ ކަމަށެވެ. އަދި ގޭގެ ވެރިފަރާތުގެ އައިޑީކާޑު ގެންދަން ޖެހޭނެ ކަމަށް ކައުންސިލުން ބުންޏެވެ.