ރާއްޖޭގެ ފަތުރުވެރިކަމާއި ގުޅޭ ގާނޫނުތަކާއި ގަވާއިދުތައް ތަންފީޒުކުރުމާއި ފަތުރުވެރިންނާއި ފަތުރުވެރިކަމުގެ ސިނާއަތުގެ ރައްކާތެރިކަން ބެލެހެއްޓުމަށް ފުލުހުންގެ ފަރާތުން އިސްކޮށްފައިވާ ޓުއަރިސްޓް ޕޮލިސް ސަރވިސް ރީބްރޭންޑްކޮށްފިއެވެ.

މިކަމަށްޓަކައި ހުޅުމާލެ ރުއްގަނޑު ސަރަހައްދުގައި ބޭއްވި ހާއްސަ ރަސްމިއްޔާތެއްގައި ފުލުހުން ބުނީ ސްޓްރެޓެޖިކް ޕެލޭނެއްގެ ދަށުން ކުރިއަށް އޮތް ފަސް އަހަރުގެ ތެރޭގައި ޓޫރިސްޓް ޕޮލިސްއިން ފަތުރުވެރިންގެ ސަލާމަތާއި ރައްކާތެރިކަމަށްޓަކައި ޓުއަރިޒަމް ސިނާއަތުގައި މަސައްކަތްކުރާ ފަރާތްތަކާއި ގުޅިގެން ތަފާތު އައު ކަންތައްތައް ތައާރަފް ކުރެވިގެންދާނެ ކަމަށެވެ.

ފުލުހުން ބުނީ ޓުއަރިސްޓް ޕޮލިސްގެ މަސައްކަތްތައް ބައްޓަން ކުރާނެ ޝިއާރެއްގެ ގޮތުގައި "ޓްރެވަލް ސޭފް، ސްވިމް ސޭފް" ކަނޑައަޅާ މިހާރު އެ ފަރާތުގެ މަސައްކަތްތައް ފަށާފައިވާނެ ކަމަށެވެ.

ރާއްޖެ އެމްވީއަށް މައުލޫމާތު ދެއްވަމުން ޓުއަރިސްޓް ޕޮލިސްގެ ހެޑް މޫސާ ރަޝީދު (އެސްޕީ) ވިދާޅުވީ ރީބްރޭންޑް ކުރުމާއެކު، ތަފާތަކަށް ވެގެންދާނީ ފަތުރުވެރިންނާއި ގާތުން މަސައްކަތްތައް ކުރެވިގެންދިއުން ކަމަށެވެ. އަދި ކުރީގައި އޮންނަ އުސޫލުންނަމަ، ޓުއަރިސްޓް ޕޮލިސްގެ ހިދުމަތް ދެވިގެންދަނީ ވަކި ރަށްތަކެއްގައި ހުންނަ ޕޮލިސް ސްޓޭޝަންތަކުން ކަމަށެވެ. ނަމަވެސް ރީބްރޭންޑް ކުރެވިގެންދިއުމާއެކު ހެލްޕް ބޭސްތައް އެކި ހިސާބުތަކަށް ބަދަލުކުރެވިގެންދާނެ ކަމަށް ރަޝީދު ވިދާޅުވިއެވެ.

ރަޝީދު އިތުރަށް ވިދާޅުވީ ފަތުރުވެރިންގެ ސަލާމަތާއި ރައްކާތެރިކަމަށް ފުލުހުން އިސްކަމެއް ދެމުން އަންނަ ކަމަށާއި އެންމެ ބޮޑު އެއް ބޭނުމަކީ އެކަން އިތުރަށް ފުޅާވެގެން ދިއުން ކަމަށެވެ. އަދި ފަތުރވެރިކަމުގެ ދާއިރާގައި މަސައްކަތްކުރާ ހުރިހާ ފަރާތްތަކަށްވެސް، ފަތުރުވެރިންގެ ސަލާމަތާއި ރައްކާތެރިކަމަށް އަޅަން ހުރި ފިޔަވަޅުތައް އެޅުމަށް އޭނާ އިލްތިމާސްކުރެއްވިއެވެ.

ޓުއަރިސްޓް ފުލުހުންގެ ގޮތުގައި މިހާރު ހަރަކާތްތެރިވަމުން އަންނަނީ ގާތްގަނޑަކަށް 20 ވަރަަކަށް ފުލުހުންނެވެ.