ޓަގު ބޯޓެއްގެ ފަޅުވެރިއަކަށްވެގެން ފިއްލަވައިގެން އިންޑިއާ އަށް ވަޑައިގެންނެވި މައްސަލާގައި ކުރީގެ ނައިބް ރައީސް އަހުމަދު އަދީބު ތިން މަހާއި 18 ދުވަހު ޖަލަށްލާން ހުކުމްކޮށްފިއެވެ.
ގާނޫނު ހިންގުމަށް ހުރަސް އެޅުމުގެ ދައުވާގައި ދައުލަތުން ބުނެފައިވަނީ ޕާސްޕޯޓް ހިފަހައްޓާފައި ވަނިކޮށް ކަނޑުމަގު އިންޑިއާ އަށް ވަޑައިގަންނަވަން އުޅުއްވަނިކޮށް ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، އެކަމަށް ޖިނާއީ އިޖުރާއަތުގެ ގާނޫނުގައި ކަނޑައެޅިފައިވާ އަދަބަކީ ޖުނުހުގެ އެއްވަނަ ދަރަޖައިގެ ކުށެއް ކަމަށެވެ.
އަދީބް ވިދާޅުވީ، ފިއްލަވަން ޖެހިވަޑައިގަތީ ފުރާނައަށް ނުރައްކާތެރިވުމުން ބޭރު ގައުމަކުން ސިޔާސީ ހިމާޔަތް ހޯއްދަވަމުން ކަމަށެެވެ. އަދި އެފަދަ ކަމެއް އިތުރަށް ތަކުރާރު ނުވާނެ ކަމަށް އަދީބް ވަނީ ވިދާޅުވެފައެވެ.
ވަރގޯ 9 ކިޔާ ޓަގް ބޯޓެއްގައި އިންޑިއާގެ ޓުޓްކޮރިން ބަނދަރުން އެ ގައުމަށް އެތެރެވާން އުޅެނިކޮށް އަދީބު ހައްޔަރު ކޮށްފައިވަނީ އޮގަސްޓު މަހުގެ 1 ވަނަ ދުވަހުއެވެ. އެ ބޯޓަކީ ސިންގަޕޫރުގައި ރެޖިސްޓަރީ ކޮށްފައިވާ ޓަގް ބޯޓެކެވެ.ފުލުހުން ބުނެފައި ވަނީ ޓަގް ބޯޓު އެއިދާރާގެ ބެލުމުގެ ދަށަށް ގެންގޮސްފައިވަނީ އޮގަސްޓް މަހުގެ ހަ ވަނަ ދުވަހުއެވެ.
