މާލޭގައި ދިރުއުޅޭ ރައްޔިތުންނަށް ދަތުރުދިއުމަށްޓަކާ ހަމަޖައްސާފައިވާ "ޕިކްނިކް އައިލެންޑް" ތަރައްގީކުރަނީ 6 ފެމިލީ ވިލާއާއިއެކު ކަމަށް ސިންހާ އެސްޓޭޓް އިން ބުނެފިއެވެ.

މިފަދައިން ސިންހާ އެސްޓޭޓް އިން ބުނެފައިވަނީ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައެވެ.

މި ވިލާތަކުގައި ތިބުމަށް ފުރުސަތު ދެވެނީ އެންމެ ފުރަތަމަ އަންނަ ފަރާތަށް ކަމަށް ވެސް ސިންހާ އެސްޓޭޓުން ބުންޏެވެ. "އޯވަރ ނައިޓް" ނުކުރެވޭނެކަން ފާހަގަ ކުރަމުން ސިންހާ އެސްޓޭޓޫން ބުނީ ޕިކްނިކް އައިލެންޑްގައި ހުންނަ ކޮޓަރިތަކަކީ ހަމައެކަނި ދުވާލު ތިބެލުމަށް ޚާއްސަ ކޮޓަރިތަކެއް ކަމަށެވެ.

ޕިކްނިކް އައިލެންޑު ތަރައްގީ ކުރުމަށް ނިންމާފައިވަނީ ޒަމާނީ ވަސީލަތްތަކާ އެކުއެވެ. އޭގެ ތެރޭގައި ބާބަކިއު އަށް ޚާއްސަ ސަރަހައްދަކާއި، މޫދާއި، ގޮނޑުދޮށުގައި ކުޅޭ ކުޅިވަރުތައް ކުޅެވޭނެ އިންތިޒާމުގެ އިތުރުން ކިޑްސް ކްލަބް އާއި ޗޭންޖިން ރޫމްތައް ވެސް ހުންނާނެ އެވެ.

ސިންހާ އެސްޓޭޓުން މި މަޝްރޫއު ކުރިއަށް ގެންދަނީ 7 ކުންފުންޏަކާއި ގުޅިގެންނެވެ. މި ނޫސްވެރިންގެ ބައްދަލުވުމުގައި ސިންހާ އެސްޓޭޓުގެ އިސްވެރިންވަނީ މި މަޝްރޫގެ ދަށުން އެކުގައި މަސައްކަތް ކުރާ ކުންފުނިތަކަށާއި، މުޖުތަމައު އަށް މި މަޝްރޫގެ ސަބަބުން ކުރާނެ ފައިދާތަކަށް އަލި އަޅުވާލާފައެވެ.

"ޕިކްނިކް އައިލެންޑް" އަކީ މާލޭގައި ދިރިއުޅޭ އާއިލާތަކުގެ ތެރެއިން ގިނަ އާއިލާތައް ކުދިކުދި ތަންތަންކޮޅުގައި ހާސްކަމުގައި ދިރިއުޅެމުންދާއިރު، ހަފްތާގެ ބުރަ މަސައްކަތަށްފަހު ޗުއްޓީ ހޭދަކޮށްލުމަށް އަތްފޯރާއަގެއްގައި ދަތުރު ދިޔުމަށްޓަކައި ހަދާ ރަށެކެވެ.

ތައިލެންޑްގެ ސިންހާ އެސްޓޭޓުން، މާލޭގެ ދެކުނުން ފަސް ކިލޯމީޓަރު ދުރުގައި އޮންނަ އެނބޫދޫ ފަޅުގައި ރިސޯޓް ހެދުމަށް ހިއްކާފައިވާ ނުވަ ރަށުގެ ތެރެއިން މާލޭގައި ދިރިއުޅޭ މީހުން ދަތުރު ދިއުމަށް ހަމަޖެއްސި ރަށެކެވެ. މިއީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވެރިކަމުގެ ފުރަތަމަ 100 ދުވަހުގެ ވައުދެކެވެ.