މިއީ ރަނގަޅު ފެށުމެއް ކަމަށާއި، މެޗުގެ ނަތީޖާ ޓީސީ ކޮޅަށް އެނބުރުނީ ކުޅުންތެރިންގެ މަސައްކަތުން ކަމަށް ޓީސީ ސްޕޯޓްސް ކްލަބްގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.

މާލޭ ލީގުގައި ވެލެންސިއާ އަތުން 0-3 ގެ ނަތީޖާއިން ޓީސީ މޮޅުވި މެޗަށް ފަހު ނޫސްވެރިންނަށް މައުލޫމާތު ދެމުން ނިޒާމްބެ ބުނީ ވެލެންސިއާއަކީ މިފަހަރު ލީގުގައި އެންމެ މަތިން ރޭންކްކުރާ އެއްޓީމެއް ކަމަށާއި، ފުރަތަމަ މެޗުގައި އެޓީމާ ދެކޮޅަށް ރަނގަޅު ނަތީޖާއެއް ނެރެވުމަކީ ރަނގަޅު ފެށުމެއް ކަމަށެވެ.

ނިޒާމްބެ ބުނީ މެޗު ފެށިގެން ރަނގަޅަށް ކުޅުނީ ވެލެންސިއާ ކަމަށާއި، އެހެން ނަމަވެސް ޓީސީ ކުޅުންތެރިން ދެއްކި މޮޅު ކުޅުމާއެކު ނަތީޖާ އަނބުރާލެވުނު ކަމަށެވެ. އެގޮތުން މިއީ ފުރަތަމަ މެޗަށް ބަލާފައި ރަނގަޅު ފެށުމެއް ކަމަށް ވެސް އޭނާ ވަނީ ބުނެފައެވެ.

ކުޅުންތެރިންގެ ފިޓްނަސް ލެވެލްއާ މެދު ހިތްހަމަޖެހޭ ކަމަށް ފާހަގަކުރަމުން ނިޒާމްބެ ބުނީ އެ ކުޅުންތެރިންގެ ފިޓްނަސް ލެވެލް ރަނގަޅު ކުރުމަށް އެންމެ ބޮޑަށް އެހީވަނީ ޕްރީ ސީޒަން ކަމަށާއި، އެގޮތުން ޕްރީ ސީޒަނަށް ފަހު ބަންގްލަދޭޝްގައި ނިމިގެންދިޔަ ޝައިހް ކަމާލް އިންޓަނޭޝަނަލް ކްލަބް ކަޕްގައި ކުޅުނު ފުރަތަމަ މެޗުގައި ވެސް ޓީމު ތަފާތު ދައްކާފައިވާ ކަމަށެވެ.

މީގެ އިތުރުން އޭނާ ބުނީ އެ މުބާރާތުން ފިޓްނަސްގެ އިތުރުން ޓީމަށް އެހެން ފައިދާތަކެއްވެސް ވެފައިވާ ކަމަށާއި، އެގޮތުން އެންމެ ބޮޑަށް ފައިދާވީ ރަނގަޅު ކުރަންޖެހޭ ކުދިކުދި ކަންކަން ޓީމުން ރަނގަޅު ކުރުން ކަމަށެވެ.